اسلام آباد۔ 06جون (اے پی پی) احساس قومی راجی وزرگزرانی رجسٹر ی 2021نااے پی آئی آر کیٹیکچرون ونڈواحساس نا شش اہم تمبہ غاتیان اسٹ ءِ۔ داسروے نا کمک اٹ ٹہیفوک آ رجسٹری 90.5درسد پورو ءِ۔ احساس تخفیف نیزگاری و راجی رکھ ڈویژن نا رداٹ عملدرآمد کروک آ غٹ ادارہ غاتے کن ڈیٹاشیئرنگ و ڈیٹااسکان رسینگ کن تینا ڈٹ آتیا عمل کننگ اُن۔ ڈیٹاشیئرنگ اے پی آئی آر کیٹیکچرناکمک اٹ کننگک۔ احساس اے پی آئی نارداٹ غٹ عملدرآمدی ادارہ غاتے ڈیٹا اسکان رسینگ کن دوئی مریک تانکہ اورجسٹری ٹی حقدار آتا معلومداری ءِ سہی کننگ کیر۔ ہنداوڑاوفتے گمانی حقدار آتا اہلیت معلوم کننگ نا اختیار دوئی مریک۔ ہرادارہ نا کنڈآن خاہوت و فرد اسے ملوک آ فائدہ غاتا معلومداری غٹ عملدرآمدی ادارہ غاتے دوئی مریک۔ہڑتوم آ کنڈآتا ڈیٹانا اشتراک مریک، ہراادارہ غاتون ڈیٹاءِ شیئر کننگک اوہم تینا معلومداری اٹ رجسٹری ءِ اپ ڈیٹ کیرہ و ہنداوڑوخت اتون اوار اوار رجسٹری پین سوگومریک۔ ڈاکٹر ثانیہ نشتر ءِ دامچ آ عمل نا حتمی پریذنٹیشن تننگا۔ اواحساس اے پی آئی آر کیٹیکچر آ کاریم کروک آ ٹیکنیکل ٹیم انا ستاءِ کرے و مبارکبادی تس۔ اوکان پد، داسروس نا دنگ ءِ صوبہ و احساس آعملدرآمد کروک آ ایلو ادارہ غاتے کن ودفنگک۔ اے پی آئی آر کیٹیکچر احساس ون ونڈوپالیسی ءِ تینا کننگ اٹ آسراتی فراوان کیک۔داپالیسی نامسخت احساس ایکوسسٹم اٹ ہدف بندی نا عمل ءِ شاہدی آ مبنی، شفاف و گچین کننگ ءِ۔ داآرکیٹیکچرنا کمک اٹ یوٹیلیٹی اسٹورزکارپوریشن تے احساس ڈیٹابیس اتون ہم منسلک کننگانے ہراڑآن سبسڈی پروگرام آ عملدرآمد مریک۔ داوڑوڈول ءِ اولیکو وار تینا کننگ انگ ءِ ہراشفافیت نا بنداو ءِ تخک۔ مہالو، اسہ سرکاری ءُ ادارہ اسے تون ہم دامعلوم کننگ نا ہچ ءُ وڑوڈول اس ساڑی الوکہ کہ پین سرکاری ادارہ سے نا کنڈآن فردیااُراسے نا کمک ءِ کننگ انگ ءِ۔ گڑاس اُراتے اثرورسوخ نا بنداو آ چندی فائدہ دوئی مسکہ وخت اس کہ حقدار بندغ آتے ہچ اس رسینگتوکہ۔
