اسلام آباد۔ 05جون (اے پی پی) وزیراعظم عمران خان پارینے کہ بلین ٹری سونامی ڈٹ انا سرسہبی کن مچ آ قوم ءِ یکجامرسا ساتھ تروئی مریک، دانا سرسہبی آن چاگڑد تون اوار زرگزران، سیل وسوات ءِ مون آ دننگک، کچٹی ٹی کمتی بریک، جنگل و برڈووائلڈ لائف ءِ رکھ ملک، دنیا نا ہمو ملک آک ہرا، کاربن اخراج، نا بھلا سوب ءُ اوتینا زمواری تے پورو کرسا نیزگار ملک آتے داڑتون مون تننگ کن فنڈ فراوان کیر تانکہ او تینا چاگڑد ءِ گچین کننگ کیر۔ قومی پارک و جنگل آتا رکھ اکن فارسٹ گارڈآتا کچ ءِ ودفنہ، ہندی مخلوقءِ روزگار فراوان کینہ تانکہ اودانا بنداوی، فریق جوڑمرسا دانارکھ ءِ کننگ کیر، 2030ء اسکان 60درسد بجلی قابل تجدید توانائی آ گدریفنہ۔ مچ آ قوم ءِ اواری اٹ اقوام متحدہ نا عشرہ بحالی ایکو سسٹم نا سرسہبی کن جہد کروئی ءِ۔ ہفتہ نادے آ وزیراعظم عمران خان جہانی یوم چاگڑدناوخت آ کنونشن سینٹراٹی اڈہلوک آ دود آن بطور مہمان خاص تران کرساپارے کہ پاکستان کن جہانی یوم چاگڑد نا دود انا مہمانداری اسہ بھلو شرف اسے، اودے خوشی ءِ کہ بھاز زوت پاکستان چاگڑد نا بابت کوشست آتے ٹی جہانی نقشہ ٹی بسنے، دنیا داسہ داناادراک ءِ کیک کہ پاکستان ہمو ملک آتے ٹی اوار ءِ کہ او تینا بروک آ چین تیکن گام گیج کننگ ءِ۔ اوپارے کہ مسلمان و پاکستانی قوم ءِ خواجہ اکرم ﷺ نا حدیث نا فہم المی ءِ ہراٹی اوفرمائفے کہ بروک آ دنیا کن ہندن زندہ مبو کہ پگہ کہوئی ءِ و دادنیا کن ہندن زندہ مبو کہ ہزارسال زندہ رہینگوئی ءِ، دااللہ نا پرمان ءِ کہ اوناڈغارآ قدم ءِ تخن تو اونافکر ءِ کین کہ ہراکاریم ءِ نن کننگ اُن اونا بروک آ چین تیا انت اثرتمک۔
