اسلام آباد۔ 05جون (اے پی پی) وزیرمملکت موسمیاتی بدلی زرتاج گل پارینے کہ جہانی یوم چاگڑد نا مہمانداری پاکستان کن بھلو شرف اسے، داوزیراعظم عمران خان نا کماشی ٹی قدرتی چاگڑد نا رکھ و بحالی نا کوشست آتیا جہانی برادری نا پت انا ڈیک ءِ، پاکستان دا بابت پین جامع گام گیج کیک۔ اوہفتہ نادے آ داڑے جہانی یوم چاگڑد2021ء نا دود آن تران کریکہ۔ وزیراعظم عمران خان دود انا مہمان خاص ئس۔ خصوصی کمکار موسمیاتی بدلی ملک امین اسلم، وزیرآک، پارلیمنٹ نا باسک آک، درملکی سفارتکار، چاگڑدنا بشخ انا چاہندار و بڑزکو کمامدارآک ہم دود اٹی ساڑی ئسر۔ زرتاج گل پارے کہ چاگڑد نا بابت پاکستان کن اِراپلو بھاز اہم ءُ۔ اولیکو داکہ چاگڑدی کچٹی نا سوب جوڑ مروک آ گرین ہاؤس گیس آتا پیش تمنگ اٹ پاکستان نا بشخ مفننگ نا بریبر ءِ۔ ارٹ میکو داکہ موسمیاتی بدلی نااثرآتا سوب آن رونما مروک آ قدرتی آفت آتیان غٹ آن زیات زہمی مروک آ 10ملک آتے ٹی داناشمارمریک۔ اوپارے کہ وزیراعظم عمران خان ملک انا آخبت و بروک آچین تے رکھ کننگ نا ویژن تخک۔ دامسخت کن اوساف و سرسوز پاکستان نا تصور ءِ پیش کرے ہرادے مون آ تخسا حکومت ملکی تاریخ نا بھلا ڈٹ و انقلابی پروگرام درستی راستی کرفینے۔ اوپارے کہ مچ آ ملک اٹی ٹین بلین ٹری سونامی پروگرام نا رداٹ داتم اسکان اسہ ارب درخت خلنگ نا ہدف ءِ دوئی کننگانے۔ داڈٹ آن ہراڑے جنگل آتا رقبہ ٹی ودکی مریک ہموڑے 85ہزار گرین روزگار نا وارخواہی ہم ودی مسنے۔ اوپارے کہ چاگڑد ءِ کچٹی آن بچفنگ نا کوشست آتا چرجوئی ٹی بجلی آ چلینگوک آ گاڈی درستی راستی کرفنگ انگ ءِ و پالیسی نا رداٹ 2030اسکان 30درسد گاڈی بجلی آ گدریفنگک
