اسلام آباد۔ 05جون (اے پی پی) وزیراعظم نا خصوصی کمکار چاگرڈ ملک امین اسلم پارینے کہ جہانی یوم چاگڑدنا مہمانداری پاکستان کن گمرنا سوب ءِ، پاکستان 10لکھ ہیکڑ جنگل آتا بحالی نا دنیا تون قول کرینے و داچیلنج ءِ امناکرینے۔ پاکستان نا کنڈآن ایکو سسٹم نا بحالی نا فلسفہ فطرت نا رکھ و مخلوق ءِ ملازمت تننگ ءِ۔ اوہفتہ نادے آ داڑے کنونشن سینٹر اٹی جہانی یوم چاگڑد نا دود آن تران کریکہ ہرانا مہمان خاص وزیراعظم عمران خان ئس و دادود آن دنیا نا بھلا ملک آتا سروک آک ہم تران کریر۔ ملک امین اسلم تینا تران اٹی پارے کہ پاکستان ءِ دا شرف ملانے کہ او جہانی یوم چاگڑد نا مرکزی دود انا مہمانداری ءِ کننگ ءِ ہراننکن گمرنا قابل ءِ۔ اوپارے کہ ایکوسسٹم نا بحالی آن بروک آ 10سال اٹی سمت انا تعین مریک، دنیا اگہ داٹی تینا سمت ءِ بدل کتو تو آخبت اٹ حالیت آک جتامریرہ۔ اوپارے کہ ننے چاگڑد تون جنگ کروئی اف بلکن دادے تینا سنگت جوڑکرسا مون آہنوئی ءِ۔ اوپارے کہ پاکستان اٹی داتم اسکان 80ہزار بندغ ءِ گرین روزگارتون وابستہ کننگانے وخت اس کہ داٹی داسال 2لکھ نا پین ودکی کینہ۔ اوپارے کہ وزیراعظم عمران خان نا 10ارب درخت خلنگ نا وژن نا رداٹ اسہ ارب درخت خلکونن۔ اوپارے کہ پاکستان دنیا نا 10لکھ ہیکڑ درخت خلنگ نا چیلنج ءِ امنا کرینے داڑآن نئے بیرہی دنیا بلکن ننا بروک آ چین تے ہم فائدہ مریک داپروگرام پک مسنے۔، اوپارے کہ پاکستان اٹی اسہ سال اٹی 15پوسکن ءُ پارکس جوڑ کننگانے اوکان پد داسہ قومی پارکس سروس نا بناءِ کننگ اُن دانارداٹ زیارت اٹ اکیڈیمی اس جوڑ کننگ والا اُن ہموکان تربیت دوئی کروک آ 15ہزار ورناتے داپارک آتیٹی روزگار ایتنہ۔
