اسلام آباد۔05جون (اے پی پی) وزیراعظم عمران خان پارینے کہ دنیا نا ہزگارانگا ملک آک گلوبل وارمنگ نامقابلہ کن خاطرخواہ گام گیج کتنو، پاکستان درجہ حرارت اٹی کمتی نا بابت دنیا نا ایلو ملک آتا مقابلہ ٹی زیات کاریم کرینے۔ہفتہ نادے 5جون 2021ء آ اڈ تروک آ اقوام متحدہ نا ”چاگڑدنا سالانہ جہانی دے“ انا مہمانداری ءِ پاکستان کننگ ءِ، ساڑی سال تیٹی پاکستان موسمیاتی بدلی و نوکاپ آتیان زیات زہمی مروک آ ملک آتے ٹی اوار ءِ۔ ہرافتا سوب آن لکھ آ بندغ آتے ہمپ وبٹ کروئی تمک وخت اس ک نوکاپ آن کشاری رقبہ ہم بھاز زہمی مریک۔ برطانوی خبررساں ادارہ رائٹرز تون گپ وتران کرسا وزیراعظم عمران خان سوج کرے کہ، انت شون ہلوک دنیا دابابت مناسب کاریم کرینے؟ ہرانا ورندی نفی ٹی ءِ۔ اوپارے کہ چاگڑد دشمن گیس آتا زیات پیش تمنگ شون ہلوک ملک آتے ٹی ءِ و ای سرپند کیوہ کہ او گیس آتا اخراج ءِ توننگ کن جوان گام گیج کتنو۔ وزیراعظم عمران خان پارے کہ اینخو سال چاگڑد نا جہانی دے انا وخت آ اقوام متحدہ نا ایکسوسسٹم نا بحالی نا دہائی نا بناءِ کننگ انگ ءِ۔ اوایکوسسٹم ءِ سرمروک آ نسخان نا چٹفنگ و اونا بحالی کن ترندتر گام گیج آتا گرج آ زور شاغا۔ وزیراعظم عمران خان نا کماشی ٹی پاکستان اٹی بحالی نا چندی گام گیج کننگانے ہرافتے ٹی 10ارب درخت خلنگ نا ڈٹ ہم اوار ءِ و داچرجوئی ٹی ہندا ہفتہ ٹی وزیراعظم دامہم نا رداٹ ارب آ درخت خلکونے۔ رائٹرز نا رپورٹ نارداٹ اقوام متحدہ نا چاگڑدی پروگرام (یواین ای پی) تینا اسہ تازہ رپورٹ اسے ٹی پارینے کہ تدوک آ کیہی دہائی ٹی جنگل آتے ٹی پدریسہ کمتی آن پد تدوک آ پنچ سال اٹی چاگڑد نا گچینی نا جامع گام گیج کرینے تانکہ قدرت نا سرمایہ ناکمتی نا مون ءِ توننگ مرے ولے دابابت پین گام گیج آتا گرج ءِ۔عمران خان پارے کہ پاکستان کون آ پدتموک ملک آک گرج آن زیات کاریم کرینو تانکہ جہانی درجہ حرارت اٹ ودکی وچاگڑد نا ویل آتامون ءِ توننگ مرے۔ اوپارے کہ کچ اٹ وسیلہ غاتیان پد ہم پدتموک ملک آک خاطرخواہ گام گیج کرینو وخت اس کہ اوفتے جان جوڑی و تعلیم کون آ ویل آک ہم مون تروک ءُ۔
