اسلام آباد۔ 05جون (اے پی پی) پاکستان نا مہمانداری ٹی (اینو) 5جون آ مچ آدنیاٹی جہانی یوم چاگڑد 2021اڈتنگک۔ دابابت مرکزی دود جناح کنونشن سینٹراسلام آباد اٹی مریک، وزیراعظم عمران خان دوداٹی مہمان خاص مریک وخت اس کہ دنیا نا چندی ملک آک و جہانی ادارہ غاتا مندوبینک کورونا نا سوب آن ورچوئل وڑاٹ دوداٹی بشخ ہلیرہ۔ پاکستان نا کنڈآن جہانی یوم چاگڑد نا مہماندار ملک انا حیثیت اٹ ٹین بلین ٹری سونامی پروگرام نا رداٹ اسہ ارب درخت خلنگ نا ہدف ءِ دوئی کننگ، رضاکارانہ بون چیلنج ءِ امنا کننگ، سمندری حیات کن رکھوک علاقہ غاتا جوڑ کننگ و ملک انا اولیکو گرین بانڈ انا جاری کننگ تون اوار نیچر فنانسنگ نا پوسکن ءُ وڑوڈول درستی راستی کرفنگ کون آ بھلا سرسہبی تا پڑو ءِ کننگک۔ داوخت آ است خواہی تخوک آ ایلوملک آتون اواری اٹ ایکو سسٹم نا بحالی کن جہانی سیوت نا ٹہیفنگ نا بارواٹ ہم اہم پڑوناہم گمانی ءِ۔ جہانی یوم چاگڑدنا دود اٹی ڈائریکٹر جنرل یواین پروگرام چاگڑد اینگراینڈرسن، ادارہ خور و کشت وکشار ایف اے او، یواین ہیبیٹاٹ و یواین ڈی پی نا سینئر کمامدار، جرمنی و سعودی عرب نا حکومتی عہدیدار آتون اوار ایلو بڑزکومندوبینک ہم بشخ ہلیرہ۔ پاکستان ءِ جہانی یوم چاگڑد نا دود آتا مہمانداری نا داشرف ءِ وزیراعظم عمران خان نا کماشی ٹی حکومت نا کنڈآن قدرتی چاگڑد نا بحالی و رکھ و ویل آتا ایسری کن قدرتی وڑوڈول آتے کاریم اٹ اتنگ نا کوشست آتا جہانی کہول آ اعتراف ءِ۔وزیراعظم عمران خان نا حیاتیاتی تنوع نا کنونشن و اقوام متحدہ نا جنرل اسمبلی آن قائدانہ تران و اونا کماشی ٹی ساف و سرسوزپاکستان پروگرام، ٹین بلین ٹری سونامی پروجیکٹ و جنگلی حیات کن رکھوک علاقہ غاتے مون آ دننگ کون آ قدرتی چاگڑدنا رکھ و بحالی نا ڈٹ آتا دروشم اٹ پاکستان نا جہانی لیڈر نا حیثیت اٹ کڑد ءِ امناکرسا یواین ای پی جہانی یوم چاگڑدنا مہمانداری نا سلہ خلکوسس۔ جہانی یوم چاگڑد مچ آدنیا ٹی ہرسال 5جون آ اڈتننگک۔ داسال جہانی یوم چاگڑد ”ایکوسسٹم نا بحالی“ نا سرحال آن اڈتننگ انگ ءِ و داوخت آ فطرت اٹ تینا تعلق ءِ اول سرآن جوڑ کننگ نا گرج آ زور شاغنگک۔
