اسلام آباد۔ 04جون (اے پی پی) پاکستان سٹیزن پورٹل آ غاوآ دمدستی ایسری کن گام گیج نا نتیجہ ٹی راولپنڈی نا اِراجنوزان ایڑھ تے 22سال آن پد میراتی جائیداد نا حق رسینگا۔ پرائم منسٹر ڈیلیوری یونٹ(پی ایم ڈی یو) نا کنڈآن جاری سرجم حوال آتا رداٹ اِرا جنوزان ایڑھ تنظیم اختر و تنویر سہراب تینا میراتی ڈغار آ کوزہ و میرات نا بشخنگ نا باندات نا بابت پاکستان سٹیزن پارٹل آ غاو کریسر ہراڑآ وزیراعظم عمران خان دمدستی نوٹس ہلک۔
ہڑتوم آ جنوزان ایڑھ تا پاکستان سٹیزن پورٹل آ غاواٹ پاننگاسس کہ ایڈیشنل ڈپٹی کمشنر ریونیو بیدس موقف ءِ ہُننگ آن اوفتا غاو ءِ خارج کرے۔ ہنداخاطرآن ننا دادرسی ءِ کننگے۔ پی ایم ڈی یو نا رداٹ وزیراعظم چیف سیکرٹری پنجاب ءِ دا بابت انکوائری نا پارت کریسس۔ وزیراعظم داہم پارت کریسس کہ راولپنڈی ڈویژن نا غٹ ریونیو آفیسرآتاکارکڑد نا جانچ وپڑتال ءِ کننگے۔ وزیراعظم نا پرمان نامہ ٹی پاننگاکہ بڑزکو آفیسر آک تینا ماحت آفیسر آتاکارکڑد نا جاچ ءِ ہلیر۔ راولپنڈی نا سرکاری آفیسر آتا کارکڑد رپورٹ ءِ زوت وزیراعظم آفس آ گدریفر۔ سرکاری آفیسر آتا السی غاوتا بابت ڈیش بورڈ آتا جانچ پڑتال ءِ کننگے،آفیسر آک الس نا ویل آتے ایسر کننگ کن گام گیج کیر داکان بیدس ہڑتوم آ جنوزان ایڑک تنظیم اختر و تنویر سہراب تینا ویڈیو کلہو اٹی پاریر کہ دادے ننکن بھاز خوشی نادے اسے ہراتم 22سال انا جہد آن پد ننے ننا میراتی حق ملانے، داڑآ نن اللہ تعالیٰ نا حضور سجدہ کرسا وزیراعظم عمران خان نا منت وار اُن و اوڑکن دعا کینہ کہ اللہ تعالیٰ اونا حامی و ناصر مرے۔
