اسلام آباد۔ 24مارچ (اے پی پی) بنجائی وزیر سائنس ٹیکنالوجی و دفاعی پیداوار رانا تنویر حسین و پاکستان ہائی کمیشن کوالالمپور نا ہائی کمشنر سید حسن رضا پارینے کہ پاکستان بروک آ 15سال اٹی اسہ بھلو اقتصادی واک اسے نا وڑاٹ مون آ بریک ، ننا خواہش ءِ کہ پاکستان و ملائیشیا نا نیام اٹ واپاری سرجز آک زیات مریر و دا ننا ہی کوشست آک ءُ کہ ملائیشین کمپنیک پاکستان تون واپار اٹی است خواہی ظاہر کرینو۔ پاکستان ہائی کمیشن کوالالمپور نا کنڈآن ملائیشیا ٹی زوت صنعتی نمائش اس اڈتننگک ہراٹی پیشن نا ملک صنعت کار و کاروباری تپہ ءِ پاکستان اٹی زرکاری نا فائدہ غاتیان معلومدار کننگک، او ملائیشیا نا شار کوالالمپور اٹی یوم پاکستان نا مناسبت آن اڈ ہلوک دود و پاکستان ہائی کمیشن نا اِرغ آن خصوصی تران کریکہ، اِرغ اٹی ملائیشیا نا رائل فیملی تون اوار درملکی سفارتکار ، بزنس کمیونٹی ، ملائیشین بڑزکو کمامدارآک ساڑی ئسر ، ہائی کمشنر حسن رضا یوم پاکستان نا دود آن تران کرسا مستی پارے کہ ملائیشیا ٹی گدرینگوک آ 3سال اٹی پاکستانی کمیونٹی ءِ مون تروک ویل آتیٹی کمتی بسنے وخت اس کہ مشن پاکستانی تا ویل آتا ایسری کن تینا پبی کڑد ءِ ادا کننگ ءِ، داوخت آ مہمان خاص رانا تنویر حسین پارے کہ جمہوریت نا تسلسل آن پاکستان اٹی شونداری مسنے ، وزیر اعظم نواز شریف نا حکومت جہانی ملک آتیٹی پاکستان نا گچین امیج اس جوڑ کننگ ءِ داٹی کمک کن پیشن نا ملک رہینگوک پاکستانیک ہم تینا گچین تشخص آن وطن عزیز نا پن ءِ روشن کیر۔ دودپاکستانی ہائی کمیشن نا سبزہ زار اٹی اڈ تننگا ہراٹی پاکستانی کمیونٹی تون اوار اوار درملکی سفیر و ملائیشین کمامدارآک ہم ساڑی ئسر، کمیونٹی ویلفیئر اتاشی ڈاکٹر التماش جنجوعہ داوخت آ ساڑی مروک آتا خیرمقدم ءِ کرے۔
