اسلام آباد۔ 04جون (اے پی پی) وزیر مملکت موسمیاتی بدلی زرتاج گل پارینے کہ وزیراعظم عمران خان نا کماشی ٹی ساڑی حکومت قدرتی ماحول نا رکھ و بحالی کن انقلابی گام گیج کرینے ہرافتا مچ آ دنیا ٹی امناءِ کننگ انگ ءِ،م جہانی یوم ماحولیات نا مہمانداری پاکستان کن شرف نا سوب ءِ، الس ماحول و قدرتی وسیلہ غاتا شونداری کن حکومتی کوشست آتے ٹی پبی تفر۔ داخیال آتا درشانی ءِ او جمعہ نادے آ داڑے جہانی یوم ماحولیات نا بابت عکسی نماش نا بنائی دود اناوخت آ میڈیا تون گپ وتران کرساکرے۔ داوخت آ بنجائی وزیر حوالکاری وشینکاری چوہدری فواد حسین و وزیر مملکت فرخ حبیب ئسک ہم ساڑی ئسر۔ زرتاج گل پارے کہ پاکستان 5جون آ جہانی یوم ماحولیات نا مہمانداری ءِ کننگ ءِ۔ اقوام متحدہ نا جہانی ایونٹ نا مہمانداری پاکستان کن شرف نا سوب ءِ۔ اوپارے کہ داقدرتی ماحول نا رکھ و بحالی کن پاکستان نا سنجیدہ کوشست آتا اعتراف ءِ۔ اوپارے کہ پاکستان تحریک انصاف نا حکومت وزیراعظم عمران خان نا ساف و سرسوز پاکستان نا ویژن نا رداٹ ملک اٹی ماحولیات نا بشخ انا شونداری کن انقلابی گام گیج کرینے۔ داٹی ملک انا سرسوز رقبہ ٹی ودکی کن ٹین بلین ٹری سونامی پروگرام، قدرتی ماحول نا بحالی ناایکوری سٹوریشن پروجیکٹ، جنگل حیات نا رکھ اکن نیشنل پارک آتا مون آدننگ، کلائمیٹ سمارٹ کشت وکشار نا شونداری، کچٹی نا توننگ کن پولی تھین بیگ آتیا پابندی و بجلی آ چلینگوک آ گاڈی تے درستی راستی کرفنگ کون آ بھلا پالیسی گام گیج آک اوار ءُ۔ زرتاج گل پارے کہ ننے گمر ءِ ننا حکومت مسہ سال اٹی ہموکاریم تے کرینے ہرافک تدوک آ 70سال انا تاریخ اٹی متویسر۔ اوپارے کہ کورونا نا دین انا سوب آن جہانی یوم ماحولیات نا رداٹ ورچوئل دود آتا بست وبند ءِ کننگانے۔ اقوام متحدہ نا پلیٹ فارم آن مچ آ دنیا غان ملک آک دادود آتے ٹی اوار مریرہ۔ اوپارے کہ وزیراعظم عمران خان داوخت آ پاکستانی قوم آن بیدس جہانی برادری تون ہم مخاطب مریک و قدرتی ماحول نا رکھ و بحالی نا بابت تینا ویژن و دابابت پاکستان نا سرسہبی تے تالان کیک۔
