اسلام آباد۔ 04جون (اے پی پی) وزیراعظم عمران خان پارینے کہ تحریک پاکستان آن پد نظام ءِ بدل کننگ کن غٹ آن بھلا جہد داوخت آ برجاءِ، مافیاک دانا بے سہبی کن کوشست کننگ ءُ، ولے دا جہد ننا چین تیکن اہم ءِ، پاکستان مشکل دور آن پیش تمانے، داسہ زرگزرانی شونداری، دولت اٹ ودکی و روزگار نا فراوانی نا وخت ءِ، 1960نا دہائی آنبار سوز انقلاب کن گام گیج کننگ اُن، مافیاک حکومت سازی آن دمدستی پد حکومت نا بے سہبی نا شورانا بناءِ کریسر۔ داخیال آتا درشانی ءِ او جمعہ نادے آ لودھراں آن ملتان شاہراہ نا اپ گریڈیشن و بحالی نا ڈٹ انا بنداو نا دود آن تران کرسا کرے۔ داوخت آ وزیر خارجہ شاہ محمود قریشی و وزیر مواصلات مراد سعید ئسک ہم تران کریر۔ وزیراعظم پارے کہ تدوک آ دور تیان نن مسہ ہنداخہ زیات سڑک جوڑ کرینن۔ لودھراں آن ملتان شاہراہ اہم ءِ ہرامسہ ضلع غاتے گنڈک، داڑآن سفر نا وخت و پاس کم مریک۔ وزیراعظم پارے کہ ہراتم ننا حکومت بس تو اولیکو ہفتہ ہی دا سوج بش مننگ بناکرے کہ ہرادے پوسکن آ پاکستان و حکومت نا بے سہبی نا ہیت آک بناکریر، نن دونیم سال بھاز صبراٹ گدریفین، اپوزیشن نا بارواٹ علم ئس کہ این آر او ملنگ اسکان تنقید ءِ برجاتخک،میڈیا ٹی ہم ننے آ تنقید مسکہ، دابھاز مشکل ءُ وخت اس ئس ہراڑآن گدرینگوئی تما، ہرڈے ننے آ تنقید کننگاکہ، میڈیا دا تاثر تسوسس کہ بٹن اس خلنگ آن پوسکن آ پاکستان جوڑ مریک۔ وزیراعظم پارے کہ بدلی جہد آن بریک، جہد آن بیدس اسہ راج اس ہم بدل مفک، انگریز آتا برخلاف بھلو جہد اسے آن پد ننے آجوئی ملا، قائد اعظم نا جہد ءِ ہرن تو اوٹی ہم نشیب و فراز برسا کرے، اسہ وخت اس او دلبرداشتہ مرسا برطانیہ غا ہنا۔ وزیراعظم پارے کہ مافیاتیان آجوئی یانظام نا بدلی کن جہد کننگک، 1947ء آن پد پاکستان نا نظام ءِ بدل کننگ و مافیا تیان آجوئی کن دابھلو جہد اسے۔ داوخت آ مافیاک حکومت نا بے سہبی کن کوشست کننگ ءُ، داننا چین تیکن اہم ءُ جہد اسے، داکانود نا حکمرانی نا جہد ءِ، داڑآن راج ءِ ہی بدل مروئی ءِ، زوراور ءِ کانود نا تابع کننگ ءِ۔ اوپارے کہ مچ آ شونہال ملک آتے ٹی کانود نا حکمرانی ءِ، اوڑدے ہچ ءُ کوزہ گیر، چینی مافیا و سیاسی مافیااس اف۔ وزیراعظم پارے کہ پاکستان ڈیموکریٹک موومنٹ تینے جمہوری پاہک ولے فوج ءِ پاہک کہ حکومت ءِ بٹبو، اوفتا جنگ جند انا فائدہ غاتا جنگ ءِ، اوفتا ارب آ ڈالر پیشن تموک ءُ، اوفتا غٹ دُزیک مون آ بننگ ءُ۔ اوفتا کوشست ءِ کہ وڑانا وڑاسے ٹی حکومت ءِ بِٹن۔ وزیراعظم پارے کہ کورونا نا دین آن پد ہم شرح نمو 4 درسد مس، بھارت ننا مقابلہ ٹی زرگزرانی اعتبار اٹ جوان ئس اونا روپئی سوگو ئس، اونا زرمبادلہ نا کوڑیک سوگو ئسر ولے اونا مقابلہ ٹی نن تینا مخلوق و زرگزران ءِ بچفنگ اٹ سرسہب مسن۔ اوپارے کہ پاکستان مشکل وخت آن پیش تمانے۔ 1960نا دہائی ٹی پاکستان ایشیانا چارمیکو بھلا زرگزران ئس، ولدا آن نن ہمو پالیسی آ عمل کننگ اُن، صنعت وکشت وکشار ءِ شون تننگ انگ ءِ۔ کشاری فصل آک تاریخ نا بڑزکو انگا کہول آٹو۔ بزغرآتے گنڈیری نا نہاد نا زرتس وخت آ کرفنگ آن گنڈیری نا ریکارڈ پیدوار مس۔ وزیراعظم پارے کہ بزغرآتے کن ہراپیکج ءِ اتنگ اُن اوڑآن 60انا دہائی نا انقلاب اسہ وارولدا بریک۔ چین اتون سی پیک نا ارٹ میکو فیز اٹ صنعت لگنگ ءِ، آئی ٹی آ چکار کننگ انگ ءِ۔ پاکستان نا بھلو آبادی اس ورناتیا تالان ءِ۔ 20سال مست دابشخ اٹی ہراکاریم ءِ کروئی ئسک اودے داسہ نن کننگ اُن۔ وزیراعظم پارے کہ ملک اٹی 10بھلو ڈیم جوڑ کننگ اُن۔ گچین کاری سیاست اٹ فائدہ ہرفنگ نا سوب آن مستین اٹ داکنڈآ کس اس چکار کتو، بروک آ چین تے جہانی تہوش آن کشنگ کن 10ارب درخت و قومی پارک جوڑ کننگ اُن۔ وزیراعظم پارے کہ پاکستان اٹ سیل و سوات نا بھلووارخواہی اس ساڑی ءِ۔ 12موسمیاتی زون ءُ، مستین اٹ ہرافک لندن اٹ چھٹی و عئید آتے گدریفیرہ اوفتے دانعمت آتا درک الوکہ۔ وزیراعظم پارے کہ کورونا دین انا سوب آن سیل وسوات نا بشخ زہمی مس ولے ویکسی نیشن آن پد داسہ سیل وسوات بحال مننگ ءِ، دابشخ آن درملکی زرمبادلہ نا کوڑی تیٹی ودکی کننگ کینہ، کرنٹ اکاؤنٹ زور ءِ چٹفنگ کینہ۔ وزیراعظم پارے کہ پاکستان آن مشکل وخت گدرینگانے۔ داسہ زرگزران نا شونداری، دولت ءِ ودفنگ و روزگار نا فراوانی نا وخت ءِ۔ وزیراعظم پارے کہ پاکستان اٹی تعمیراتی بشخ ءِ غٹ آن زیات آسراتی تننگانے۔ سرمٹ نا ریکارڈ بہامسنے۔ پوسکن آ پاکستان ہاؤسنگ ڈٹ اکن بینک آتیان وام انا فراوانی نا کسر اٹ بروک آ اڑاند و مشکل آتے مرکرینن۔ داسہ بینک آتون 60ارب روپئی نا وام اناڈیمانڈ بسنے، ہموفک ہرافک سجفتورہ ہم کہ اوفتا تینا اُرامریک، داڈٹ آن کِرانا زر ءِ قسط آتے ٹی ترسا اوتینا اُرانا خواجہ مریرہ۔ وزیراعظم پارے کہ بینک آتیان وام آن بیدس داڈٹ اکن پین ذریعہ ہم درستی راستی کرفنگ اُن وداچرجوئی ٹی وزیرخزانہ شوکت ترین کاریم کننگ ءِ۔ وزیراعظم پارے کہ تعمیراتی بشخ اتون 30صنعت وابستہ ءُ۔ بروک آدے تیٹی قوم ءِ پین خوشخبری ملک۔
