اسلام آباد۔ 04جون (اے پی پی) وزیر خارجہ مخدوم شاہ محمود قریشی پارینے کہ اوغانستان داوخت آ بھاز نازرک مرحلہ سے ٹی پترینگانے، 44 درسد امریکی و سیوتی فوج اوغانستان آن پیش تمانو، پورو پیش تمنگ کن 11 ستمبر نا تاریخ نا پڑو مسنے۔ جمعہ نادے آ اوغانستان نا رداٹ اڈ ہلوک آ سہ ملکی دیوان و ڈیہہ نا حالیت آتیا بیان اٹی وزیر خارجہ پارے کہ اوغانستان آن درملکی فوج انا پیش تمنگ نا عمل بناکرینے و ملک داوخت آ بھازنازرک مرحلہ ٹی پترینگانے۔ شاہ محمود قریشی پارے کہ درو سہ فریقی دیوان اٹی، کنا اوغانستان و چین نا وزیر خارجہ غاتون دابابت سرجم گپ وتران مس۔ ای اوغان وزیرخارجہ ءِ سلہ خلکونٹ کہ او پاکستان آ برے تانکہ نن اوغان امن عمل، دوحہ ٹی برجامذاکرات و آخبت نا حکمت عملی نا بابت پین گپ وتران کننگ کین۔ شاہ محمود قریشی پارے کہ اسہ کنڈآ پاکستان نا کڑد بھاز مثبت و تعمیری ءِ، ایلو کنڈآ اونا قومی سلامتی نا سلاہکار نا غیر زموارانہ بیانک تکلیف دہ ءُ۔ اودے علم مرے کہ دا منفی بیانک، سپلائرز نا کڑد ادا کروک آ دوتے ٹی کارہ۔ ننا مسخت آک بھاز پیدوار ءُ نن ڈیہہ ٹی امن و سوگوی خوانہ۔ شاہ محمود قریشی پارے کہ ننا مسخت داڈیہہ نا زرگزرانی سوگوی و روزگار نا وارخواہی نا فراوانیءِ، دابیانیہ ننا جغرافیائی اقتصادی ایجنڈا نا اسل رداٹ ءِ۔ نن”اقتصادی سفارت کاری“ آ تینا چکار ءِ کرینن۔ شاہ محمود قریشی پارے کہ داوخت آ ننے نیزگاری، کبینی و بے روزگاری کون آ چیلنج مون تروک ءِ۔ داچیلنج آتا مقابلہ ءِ کننگ کن ننے زرگزرانی انضمام، زرکاری وواپار نا کچ اٹ ودکی و روزگار نا پوسکن ءُ وارخواہی ودی کننگ نا گرج ءِ۔ ہنداخاطرآن وزیراعظم عمران خان نا ویژن ءِ مون آ تخسا”جیواکنامکس“ ننا خارجہ پالیسی نا اولیت آتے ٹی اوار ءِ۔ نن عارضی آخا مریس مدتی اقتصادی شونداری نا ایجنڈا غا عمل کننگ اُن۔
