اسلام آباد۔ 04جون (اے پی پی) بنجائی وزیر داخلہ شیخ رشید احمد پارینے کہ اسلام آباد اٹی منہ وخت آن دہشت گردی نا واقعہ غاک ودنگ ءُ، نن آ ہم اسہ ہیڈ کانسٹیبل و کانسٹیبل اس شہید مسر، اسلام آباد سیف سٹی و وائرلیس تون گنڈوک 150موبائل موٹرایگل اسکواڈز ہندا ہفتہ ٹی جوڑ کننگک، پوسکن آ فورس 8آن 10دے اٹی کاریم نا بناءِ کیک، اوغان بارڈر آ باڑ خلنگ نا کاریم 88 درسد پورو مسنے، ایران نا بارڈر آ ہم باڑخلنگ نا عمل اینخو سال انا ایسر اسکان پورو مریک۔ جمعہ نادے آ قطبی و سویلی وزیرستان نا 2دے ئی دورہ غا روانہ مننگ آن مست تینا ویڈیو کلہو اٹی وزیر داخلہ شیخ رشید احمد پارے کہ منہ وخت آن اسلام آباد اٹی دہشت گردی نا واقعہ غاک ودنگ ءُ و نن آ ہم اسہ ہیڈکانسٹیبل بشیر شاہ و کانسٹیبل عاشق شاہ شہید مسنو و داوڑننا دور حکومت اٹ پولیس نا شہید آتا کچ 9 مسنے۔ اوپارے کہ او اینو جمعہ آن 2دے ئی دورہ غا قطبی و سویلی وزیرستان نا دورہ غا ہِننگ ءِ تانکہ بارڈرمینجمنٹ ءِ ہُننگ مرے۔ اوپارے کہ نن تینا لائخی تے گچین کننگ کن اوغان بارڈر آ باڑخلنگ اُن ہرا انشاء اللہ 2تُو اٹی پورو مریک، داوخت آ اوغان بارڈرآ باڑخلنگ نا کاریم 88 درسد پورو مسنے۔ ہنداوڑ ایران بارڈرآہم باڑ خلنگ اُن ہراڑآ44 درسد کاریم مسنے و سال انا ایسراسکان پورو کننگک۔ اوپارے کہ عمران خان نا حکومت نا است خواہی ءِ کہ غٹ بارڈرتیا ہندن ءُ سسٹم اس خلنگک ہراٹی انٹرنس نا جاگہ نا جاگہ سلپ، انٹری و الیکٹرانک انٹری و ایگزت مرے ہراڑآ کاریم مننگ ءِ۔ اسلام آباد ءِ رکھ کننگ کن اسلام آباد سیف سٹی و وائرلیس تون گنڈوک 150موبائل ایگل اسکواڈ ہنداہفتہ ٹی جوڑ کننگک ہراٹی 2،2بندغ آتیا تالان 50متکن ءُ اسکواڈ ءُ۔ داوخت آ ننتون ایگل اسکواڈ نا 4 گاڈی ءُ و بجٹ اٹ پین 16گاڈی ہلینہ۔ اوپارے کہ 20گاڈی و 150موٹربائیک آتون اوار اوار اسلام آباد ءِ رکھ جوڑ کننگک انتئے کہ اسلام آباد تون خیبرپختونخوا و پنجاب گنڈوک ءِ۔ اوپارے کہ اوہمو شہید آتے خراج عقیدت پیش کیک ہرافک اسلام آباد و پاکستان نا سلامتی کن جان تسر۔ انشاء اللہ 8 آن 10دے اٹی پوسکن آ فورس ءِ اسلام آباد اٹی بناکننگک ہراٹی 150موٹربائیک اوار مریرہ و مخلوق آن کمک نا خواست ءِ۔
