اسلام آباد۔ 04جون (اے پی پی) بنجائی وزیر حوالکاری و شینکاری چوہدری فواد حسین پارینے کہ جہانی یوم ماحولیات نا مہمانداری ننکن شرف اسے، ساڑی حکومت غٹ آن زیات ماحولیات نا بارواٹ آگاہی فراوان کرے، وزیراعظم عمران خان نا وژن چین تے جوڑ کننگ ءِ، ماحولیات نا بابت دنیا پاکستان نا گام گیج آتے امنا کرینے۔ داخیال آتا درشانی ءِ او جمعہ نادے آ داڑے جہانی یوم ماحولیات نا بابت عکسی نمائش نا بنائی دود آن تران کرسا کرے۔ داوخت آ وزیر مملکت موسمیاتی بدلی زرتاج گل ہم ساڑی ئسک۔ بنجائی وزیر حوالکاری پارے کہ پاکستان داسال 5جون آ جہانی یوم ماحولیات نا مہمانداری ءِ کننگ ءِ، داسال نا سرحال ماحولیاتی نظام نا بحالی ءِ۔ اوپارے کہ ماحولیات نا بابت اینو اسکان اسہ حکومت اس ہم داخہ آگاہی فراوان کتنے اخس کہ ساڑی حکومت کرینے۔ دانا بھلا سوب وزیراعظم عمران خان نا ماحول دوست وژن ءِ۔ اوپارے کہ ننا جنگل آک بھس مسرہ، دریاک کچٹی نا گواچی مسرہ، ندی نالہ چٹار وخت اس کہ درخت ناپید مسکہ، اسہ حکومت اس ہم دابارواٹ سجفتو ہرانا سوب آن ماحولیاتی نظام ءِ بھاز نسخان مس۔ اوپارے کہ اینو پاکستان اٹی اسہ ہندن ءُ لیڈر ا س ساڑی ءِ ہرانا وژن چین تے جوڑ کننگ ءِ۔ نن خیبرپختونخوا ٹی ون بلین ٹری سونامی نا بناءِ کرین، داپروگرام نا جہانی کہول آ ستاءِ کننگا، اقوام متحدہ نا ادارہ غاک ہم دانا سفت ءِ کریر، داسہ نن10بلین ٹری سونامی نا بناءِ کرینن، داٹی بھازبھلو سرسہبی اس ملانے۔ اوپارے کہ دا گام گیج آتا سوب آن اینو مچ آ دنیا پاکستان ءِ قدر انا نظر اٹ ہرک۔ اوجہانی یوم ماحولیات نا بابت عکسی نمائش نا اڈتننگ آ وزیر مملکت موسمیاتی بدلی زرتاج گل ءِ مبارکبادی تس۔ ایسر اٹ او اسلام آباد پولیس نا اِراکارندہ غاتا شہیدی آ است ہسونی نا درشانی ءِ کرے۔ اوپارے کہ پاکستان دہشت گردی نا برخلاف جنگ تننگ ءِ، دا جنگ برجاءِ، مچ آ قوم تدوک آ دے شہید مروک آ پولیس کارندہ غاتا خاہوت آتون تفوک ءُ، دوبہ دار آتے زوت دزگیر کرسا اوفتے اوفتا کروک نا سزا تننگک۔
