اسلام آباد۔ 04جون (اے پی پی) بنجائی وزیر مواصلات مراد سعید پارینے کہ سکھر۔حیدرآباد موٹروے آ پبلک پرائیویٹ شریداری آن مسہ تُو اٹی کاریم بناکیک، نیشنل ہائی وے اتھارٹی نا ریونیو ٹی 105درسد ودکی مسنے، مستین نا مقابلہ ٹی این ایچ اے نا ڈٹ آتے تینا وسیلہ غاتیان پورو کینہ۔ داخیال آتا درشانی ءِ او جمعہ نادے آ لودھراں آن ملتان شاہراہ نا اپ گریڈیشن و بحالی نا ڈٹ انا بنداو نا دود آن تران کرساکرے۔ بنجائی وزیر پارے کہ وزیراعظم عمران خان نا کماشی ٹی ملک مون آ ہِننگ ءِ، زرکاری بننگ ءِ، کوروناتون ہراوڑمون تسونن اونا دنیا ستاءِ کننگ ءِ۔ این ایچ اے تینا ریونیو ٹی 105درسد ودکی کرینے، 72 ارب ریونیو ودانے۔ این ایچ اے تینا پیسہ غاتے اٹ سڑک جوڑ کننگ ءِ۔ نیزگاری نا چٹفنگ و روزگار نا وارخواہی ودنگ ءِ، ملک اٹی ترسیلات زر اٹی ودکی مسنے۔ اوپارے کہ دیکی روٹ آن پسماندہ علاقہ غاتے ٹی اقتصادی سرجز، سیل و سوات نا پیش خیمہ مریک۔ 1753کلومیٹر نن سڑک آتے پورو کرین۔ 6موٹروے و 16 ڈٹ آتا ڈٹ بندی ءِ کرینن و 6ہزار 118 کلومیٹر ننا دور اٹی پورو مریرہ۔ اوپارے کہ ایلو ادارہ غاتیانبار این ایچ اے ہم تینا کڑد ءِ ادا کننگ ءِ۔ سوات موٹروے نا فیزون پورو مسنے و دانا ارٹ میکو روٹ آ ہم کاریم بناکیک۔ اوپارے کہ سیالکوٹ۔ کھاریاں موٹروے نا بنا بھاز زوت مننگ ءِ۔
