اسلام آباد۔ 24مارچ (اے پی پی) پاکستان مقبوضہ کشمیر اٹی بھارتی فورس آتا کنڈآن یوم پاکستان دود آتا کوریج کروک آ ہفت کشمیری صحافی تیا بیدادی نا سخت مذمت ئِ کرسا گدرینگوک آ ہفتہ 131 ورنا و 30 حریت راہشون تا دزگیری آ سخت گڑتی تا درشانی ئِ کرینے، یوم پاکستان نا دود آک داہیت انا صفاشاہدی ئُ کہ مقبوضہ جموں و کشمیر نا الس پاکستان تون رہینگ انگ خوائک، پاکستان ڈیہہ ٹی سلہہ غاتا رُم ئِ خواپک، بھارت تون غٹ ایسری نا چاری معاملہ غاتے مذاکرات نا کمک اٹ ایسر کننگ نا خواہش مند ئِ ، اوغانستان اٹی امن کن کوشست آتے برجاتخنہ، جوزہ خیر سگالی نا وڑاٹ اوغانستان تون تینا سیم ئِ دُوارہ ملانے ، دفترخارجہ نا ترجمان محمد نفیس ذکریا پنچ شنبے نا دے داڑے ہفتہ وار پریس بریفنگ اٹی اوغانستان نا بابت اسہ سوج اسے نا ورندی ئِ ترسا پارے کہ پاکستان اوغانستان اٹی امن کن کوشست آتے برجاتخک۔ اوپارے کہ دوبہ خلنگ ہچ ئُ ویل اسے نا ایسری اف ،داڑآن بیرہ دشمن تے فائدہ مریک، نن وار وار ہمو عنصر آتا پیدواری ئِ کرینن ہرا اوغانستان اٹی نزوری نا زموار ئُ۔ ترجمان پارے کہ پاکستان دہشت گردی نا لعنت ئِ ماس آن کشنگ کن کوشست کننگ ئِ۔ سیکورٹی فورس آتا کنڈآن سرسہب آپریشن تیٹی پاکستان اٹی دہشت گردی نا واقعہ غاتیٹی نمان کمتی مسنے ہرانا جہانی برادری و میڈیا ہم اعتراف ئِ کرینے۔ پاکستان اوغانستان نا بابت ماسکو ٹی اڈ ہلوک کانفرنس اٹی بشخ ہلیک۔ ترجمان عسکریت پسند آتا بھرتی نا بابت اوغان حکومتی داواتے سختی اٹ مسترد کرے و پارے کہ دوبہ خلنگ ہچ ئُ ویل اسے نا ایسری اف۔ اوپارے کہ بھرتی تے پاکستان آخا بلکن ایلو ملک آک کننگ ئُ۔ پاکستان ہمو عنصر آتا پیدواری ئِ کرینے ہرا اوغانستان اٹی نزوری نا زموار ئُ۔ پاکستان اوغانستان تون سیم جوزہ خیر سگالی نا وڑاٹ دُوارہ ملانے و اومیت ئِ کہ اوغانستان دا سوب آتا سدباب ئِ کیک ہرافتا سوب سیم ئِ بند کروئی تما۔ ترجمان انسانی حق انا بابت امریکی رپورٹئِ حق انا منافی گوندسا پارے کہ رپورٹ اٹی بھارتی فورس آتا کنڈآن مقبوضہ کشمیر اٹی بھلو کچ اسے آ انسانی حق انا سنگین خلاف ورزی تا ہچ ئُ ذکر اس اف ہراڑآن رپورٹ نا ساکھ آ سوج انا نشان آک چست مسنو۔ ترجمان پارے کہ پاکستان اٹی غٹ شاری تا بنداوی انسانی حق ئِ پورو رکھ دوئی ئِ و پاکستان تینا جہانی و ملکی زمواری تے پورو وڑاٹ پورو کننگ ئِ۔ ترجمان پارے کہ سویلی سوڈان اٹی پاکستانی شاری ایاز حسین جمالی نا برمتہ گر تیان یلہ کننگ کن ننا کوشست آک برجائُ۔
