اسلام آباد۔ 03جون (اے پی پی) اسپیکر قومی اسمبلی اسد قیصر تون آذربائیجان نا اسپیکر صاحبہ گفاروہ پنچ شنبے نادے آ پارلیمانی ڈل اتون اوار پارلیمنٹ ہاؤس اٹ اوڑدہی کرے ہراٹی ہڑتوم آ کنڈآتا تعلقداری، ڈیہہ ءِ مون تروک ویل و تین پہ تینی است خواہی نا ایلو باندات آ گپ وتران کننگا۔ اسپیکر پارے کہ پاکستان وآذربائیجان مذہب، اخوت و تاریخ نا بے مٹ رشتہ غاتے ٹی تفوک ءُ۔ پاکستان آذربائیجان تون تینا خڑکی برادرانہ تعلقداری تے بھاز اہمیت ایتک۔ پاکستان پارلیمانی و اقتصادی کمکاری نا کمک اٹ ہڑتوم آ کنڈآتا تعلقداری تے پین ودفنگ نا خواہندار ءِ۔ اوپارے کہ ہڑتوم آ اسلامی ایلم ملک آتے ٹی اقتصادی واپار و سیل و سوات نا بشخ آتے ٹی کمکاری ءِ ودفنگ نا بھلو وارخواہی اس ساڑی ءِ۔ ہڑتوم آ ملک آتا نیام اٹ تین پہ تینی واپار نا کچ اٹ ودکی نا بھلو گمان اس ارے، اسد قیصر مستی پارے کہ ہڑتوم آ ملک آتا پارلیمنٹ نا باسک آک و ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔ کوویڈ۔ 19نا ساڑی گری ٹی ارٹ میکو پائیکو کانفرنس باسک ملک آتے ٹی اقتصادی کمکاری و پارلیمانی رابطہ غاتا مون آ دننگ اٹ مزل نا نشان اس جوڑ مریک۔ پائیکو کانفرنس اٹی پارلیمانی ڈل آتون اوار بشخ ہلنگ آ منت واراُٹ۔ علاقائی و جہانی فورم تیا آذربائیجان نا کنڈآن کشمیر نا ویل آ پاکستان نا موقف نا مخ تفی ستاکڑزک۔ پاکستان سی پیک ڈٹ ءِ نیامی ایشیائی کسرتسکان رسینگ تننگ خواہک۔ سی پیک ڈٹ انا کمک اٹ آذربائیجان تون اوار نیامی ایشیائی ریاست آک واپار ءِ مون آ دننگ کن گوادرپورٹ ءِ کاریم اٹ اتنگ کیرہ، اسد قیصر پارے کہ پاکستان ناگورنوکاروباخ نا باندات آ آذربائیجان نا موقف نا مخ تفی ءِ کیک۔ پاکستان نا قومی اسمبلی نوکورکارہ باخ نا باندات آ امنائی قرارداد منظور کرینے۔ آذربائیجان نا اسپیکر، اسپیکر قومی اسمبلی ءِ ارٹ میکو پائیکو کانفرنس نا سرسہب اڈتننگ آ مبارکبادی تس وپارے کہ پاکستان اٹ آذربائیجان نا پارلیمانی ڈل انا جم و جوش اٹ بخیر و مہمانداری آ پاکستانی الس و پارلیمان نا منت واراُٹ۔ آذربائیجان پاکستان تون تینا تعلقداری تے قدر انا نظراٹ ہرک۔ ہڑتوم آ ملک آتا پارلیمان تیٹی خڑکی رابطہ ہڑتوم آ ملک آتا الس ءِ خڑک اتنگ و ہڑتوم آ کنڈآتا تعلقداری تے سوگو کننگ کن المی ءِ۔ ارٹ میکو پائیکو کانفرنس اٹ کروک آ فیصلہ غاک باسک ملک آتا پارلیمان تیٹی کمکاری و رابطہ غاتے مون آ دننگ دوئی مریک۔ آذربائیجان کشمیر نا ویل آ پاکستان نا اصولی موقف نا مخ تفی ءِ کیک و سلامتی کونسل نا قرارداد آتا رداٹ اونا ایسری ءِ خواہک۔ ڈیہہ ٹی پائیدار امن کن کشمیر وناگورنوکارہ باخ کون آ متنازعہ ویل آتا ایسری المی ءِ۔ آذربائیجان نا اسپیکر ڈیہہ نا پارلیمان تیٹی رابطہ و کمکاری ٹی ودکی کن اسپیکر قومی اسمبلی نا کوشست آتا ستاءِ کرے و اونا امنائی ٹی میڈل آف آنر تس۔
