اسلام آباد۔ 03جون (اے پی پی) وزیر داخلہ شیخ رشید احمد پارینے کہ حکومت چینی شاری و سی پیک ڈٹ آتا بابت پوسکن آ ویزا پالیسی نا منظوری ءِ تسنے، پوسکن آ پالیسی نا رداٹ چینی شاری تیکن پوسکن آ ویزانا کم از کم مد ءِ اِراسال کننگانے۔ اوداخیال آتا درشانی ءِ پنچ شنبے نادے آ داڑے چین نا سفیر نونگ رونگ تون اوڑدہی ٹی گپ وتران کرسا کرے۔ وزارت داخلہ غان جاری بیان نا رداٹ اوڑدہی ٹی وزیر داخلہ و چین نا سفیر پاکستان چین ہڑتوم آ کنڈآتا تعلقداری تتون اوار تین پہ تینی است خواہی نا باندات و چینی شاری تیکن ویزاآسراتی سی پیک ڈٹ وپاک چین، ہڑتوم آ کنڈآتا کمکاری نا معاہدہ غاتیا گپ وتران کریر۔ وزیر داخلہ پاکستان و چین نا نیام اٹ جوڑ سفارتی تعلقداری نا 70 سال پورو مننگ آ خوشی نا درشانی ءِ کرے، داوخت آ وزیر داخلہ پارے کہ حکومت چینی شاری و سی پیک ڈٹ آتا بابت پوسکن آ ویزا پالیسی اس منظور کرینے پوسکن آ پالیسی نا رداٹ چینی شاری تیکن پوسکن آ ویزانا کم از کم مداِراسال کننگانے چینی شاری تے داسہ تعلقدار مشن آن 48گھنٹہ نا تہہ ٹی اِراسال نا ورک ویزاجاری کینہ۔ وزیر داخلہ پارے کہ چینی شاری تیکن سی پیک نا رداٹ جتا ءُ ویزاکیٹیگری اس جوڑ کرینن۔ چینی شاری تا آسراتی کن بالی پٹ آ خصوصی ڈیسک اس جوڑ کننگ انگ ءِ۔ چینی سفیر پارے کہ پاکستان نا کنڈآن چینی شاری تیکن ویزاٹی آسراتی آ حکومت نا بھاز منت واراُن۔ ویزاآسراتی آن ہڑتوم آ ملک آتا نیام اٹ تعلقداری ٹی پین پت و وسعت بریک، سی پیک تون تعلقدار ڈٹ آتے ٹی زرکاری و روزگارنا پوسکن ءُ وارخواہی ودی مریک۔ وزیر داخلہ شیخ رشید احمد کورونا ویکسی نیشن مہیا کننگ آ چینی حکومت نا منت واری ءِ ہرفے۔ چینی سفیر پارے کہ پاکستان کورونا دین ءِ کنٹرول کننگ کن بھاز جوان بست وبند کرینے۔ پاکستان اٹی اختہ چینی یونیورسٹی نا طالب علم آتا پدی نا بست وبند کننگے۔ پاکستانی طالب علم آتا نہادی تعلیمی سال زیان مننگ نا گڑتی ءِ۔ داوخت آ چینی سفیر پارے کہ چین پاکستان اقتصادی راہداری ڈٹ ہڑتوم آ ملک آتا نیام اٹ دیرینہ تعلقداری تا درشانی ءِ۔ پاکستان چین نا آئرن ایلمی ءِ، تین پہ تینی تعلقداری تیا نازءِ۔
