اسلام آباد۔ 03جون (اے پی پی) وزیراعظم نا خصوصی کمکار راجی آسراتی و تخفیف نیزگاری و سینیٹر ڈاکٹر ثانیہ نشتر پارینے کہ بے نظیر انکم سپورٹ پروگرام نا پن ءِ بدل کننگتنے، بائیو میٹرک سسٹم نا کمک اٹ مالی کمک فراوان کننگک، وسیلہ تعلیم پروگرام ءِ ڈیجیٹل کرینن، احساس کفالت، احساس وسیلہ تعلیم، احساس ایمرجنسی کیش پروگرام و احساس نشوونما پروگرام تے حکومت الس نا راجی آسراتی کن بناکرینے۔ پنچ شنبے نادے آ ایوان بالا نا دیوان اٹی وقفہ سوج آتے ٹی اوپارے کہ بی آئی ایس پی اسہ ایکٹ اسے نا رداٹ جوڑ مسوسس ودااینو ہم ساڑی ارے، اوناپن ءِ بدل کننگتنے، عدالت نا پرمان آ شخصیت آتا عکس آتے دا پروگرام آن اینک کننگانے۔ اوپارے کہ وسیلہ تعلیم پروگرام نا دنگ ءِ 50ضلع غاتیان ودفسا 150ضلع غاتسکان کننگانے و داڑآن کرپشن ءِ چٹفنگانے۔ آؤٹ سورسنگ ماڈلءِ ہم نن چٹفینن انتئے کہ داڑآن این جی اوتے بھلوٹھیکہ اس تننگاکہ دانا آپریشنل خڑچ ءِ ہم 8درسد آن کم کرسا 3درسد کننگانے۔ اوپارے کہ بے نظیر ڈیبٹ کارڈ انا جاگہ غا پوسکن ءُ پروگرام اس بناکننگانے ہراڑآن بائیو میٹرک نا کمک اٹ امداد ملک۔
