اسلام آباد۔ 03جون (اے پی پی) بنجائی وزارت خزانہ نا ترجمان پارینے کہ ساڑی آڈیٹا نا جاری کننگ آن کبینی نا منظرنامہ ٹی بھاز گچینی بسنے و کبینی نا زور اٹ کمتی نا پیدوار اشارہ ساڑی ءِ۔ جوان ءُ فصل، سپلائی نا گچین حالیت و منڈی تیٹی نہاد آتا گچین چاروکی نا نتیجہ ٹی افراط زر انا زور اٹی پین کمتی بریک۔ وزارت خزانہ نا ترجمان چارشنبے نادے آ داڑے جاری بیان اٹی پارے کہ جمعہ نادے آ نہاد آتا حساس ٹک(ایس پی آئی) و تدوک آ دوشنبے آ صارف آتے کن نہاد آتا حساس ٹک(سی پی آئی) نا بابت ڈیٹاجاری کننگ آن کبینی نا منظرنامہ ٹی بھاز گچینی بسنے، مئی نا تُو اٹی صارف آتیکن نہاد آتا حساس ٹک(سی پی آئی) 10.9درسد ریکارڈ کننگا ہرا اسہ تُو اس مست 11.2درسدئس۔ داکبینی نا زور اٹ کمتی نا پیدوار اشارہ ءِ۔ ترجمان پارے کہ پین اِراپیش رفت آن دادعویٰ نا پین تائید مننگ ءِ، اولیکو داکہ ماہانہ بنداو تیا کبینی نا کچ 0.1درسد تما ہرا اپریل اٹ اسہ درسدئس۔ ارٹ میکو داکہ مالی سال انا اولیکو 11تُو اٹی اوسط افراط زر انا کچ 8.8درسداسکان تما ہرا داکان مست اِراہندسی 10.9درسد ئس۔ ترجمان پارے کہ داہیت ہم ذکر انا قابل ءِ کہ خورانا گڑاتا کبینی ٹی ہم کمتی بننگ ءِ، شاری علاقہ غاتے ٹی کنوئی آ گڑاتا افراط زر ہرا اپریل اٹ 2.7درسد ئس، مئی ٹی کم مرسا 1.1درسد اسکان تمانے۔ ہنداوڑ خلقی آ علاقہ غاتے ٹی کنوئی آ گڑاتا افراط زر ہرااپریل اٹی 14.1درسد ئس، مئی ٹی کم مرسا 12.8درسدمس۔ ہنداوڑنا کچ آک بنداوی افراط زر اٹ ہم مون آ بننگ ءُ۔ شاری و خلقی علاقہ غاتے ٹی بنداوی افراط زر انا کچ بالترتیب 7درسدآن کم مرسا 6.8درسد و 7.7درسد آن کم مرسا 7.6درسدمسنے۔
