کوئٹہ۔ 03جون (اے پی پی) وزیراعلیٰ بلوچستان جام کمال خان پارینے کہ حکومتی امور اٹ جدت اتنگ کن ٹیکنالوجی نا کاریم اٹ اتنگ المی ءِ، پوسکن آ ٹیکنالوجی نا کاریم اٹ اتنگ آن وخت انا بچت تون فیصلہ سازی و حکومتی باندات آتے ٹی گچینی بریک، پی ایس ڈی پی نا آٹومیشن آ محکمہ پی اینڈ ڈی نا غٹ ٹیم ءِ مبارکبادی ایتیوہ، آٹومیشن نا نظام نا دنگ ءِ ایلو محکمہ غاتسکان ودفنگک، پنجاب سندھ و پشتونخوانا حکومت آک ای بلنگ و ای ٹینڈرنگ نا کنڈآ ہنانو، داہیت ءِ او پنچ شنبے نادے آ سول سیکرٹریٹ کوئٹہ ٹی صوبائی پی ایس ڈی پی نا آٹومیشن و مانیٹرنگ و ایولیشن نا بناءِ کننگ نا وخت آ اڈہلوک آ دود آن تران کرساکرے۔ داوخت آ صوبائی وزیرآک، چیف سیکرٹری، ایڈیشنل چیف سیکرٹری ڈٹ بندی و شونداری و ایلو محکمہ غاتا آفیسر آک ہم ساڑی ئسر، وزیراعلیٰ جام کمال خان پارے کہ حکومتی امور ءِ گچین وڑاٹ چلیفنگ کن ٹیکنالوجی نا کاریم اٹ اتنگ المی ءِ، ٹیکنالوجی نا سوب آن نئے بیرہ وخت انا بچت مریک بلکن الس نا مشکل آتے ٹی کمتی بننگ تون سرکاری آفیسر آتے حکومتی امور آتے زوت سرتننگ اٹ کمک رسینگک۔ اوپارے کہ ٹیکنالوجی نا گچین کاریم اٹ اتنگ چاروکی نا گچین ذریعہ ءِ و موبائل فون و پوسکن آ ٹیکنالوجی زند انا باندات ءِ پین آسان کرینے، بروک آ وخت اٹی انکوائری ٹیکنالوجی نا کمک اٹ مریک، بلوچستان نا شونداری ٹی صوبائی پی ایس ڈی پی نا کڑد 70درسد ءِ۔
