اسلام آباد۔ 03جون (اے پی پی) وزیراعظم عمران خان پارینے کہ ماحولیات نا گچینی بروک آچین تیکن المی ءِ، جہانی تہوش آن بچنگ و تیناآخبت ءِ رکھ کننگ کن 10 ارب درخت خلنگ نا ہدف ءِ پورو کننگ و قومی پارک آتے ٹی ودکی نا گرج ءِ، چین ماحولیاتی بدلی آ بھاز کاریم کرینے، او اسہ گرین سٹی اس جوڑ کرینے، نن اونا مہارت آن آزموندہ دوئی کننگ کینہ، درخت خلنگ نا بابت آگاہی ستاکڑزک۔ او پنچ شنبے نادے آ داڑے ملک اٹی گرین فنانس اٹی جدت نا بابت اڈ ہلوک آ دود آن تران کریکہ۔ داوخت آ وزیراعظم نا خصوصی کمکار ماحولیات ملک امین اسلم ہم تران کرے وخت اس کہ بلیو کاربن آ ورلڈ بینک نا سٹڈی ءِ ہم پیش کننگا۔ داوخت آ چین اتون پاکستان اٹی گرین ایکالوجیکل زون نا ڈٹ آ دستخط ہم کننگا۔ داوخت آ برطانیہ، جرمنی و کینیڈا تون پاکستان اولیکو نیچربانڈ اکن ہیت وگپ نا بنانا اسیجائی اعلامیہ غا دستخط کننگا۔ دادود ماحولیات نا جہانی دے انا رداٹ اڈتننگا۔ وزیراعظم عمران خان تینا تران اٹی پارے کہ موسمیاتی بدلی نا اثرآتیان بچنگ و جنگل آتے ودفنگ تینا بروک آ چین تیکن المی ءِ۔ 10 ارب درخت پاکستان نا گرج ءِ و حکومت نا 2023اسکان ہدف ءِ۔ ننے تینا آخبت ءِ رکھ کروئی ءِ۔ جہانی باسنی آن بچنگ کن قومی پارک آتے ٹی ودکی، شجرکاری، اربن فاریسٹری نا گرج ءِ۔ صحراتے سرسوز جوڑ کننگ نا چین انا آزموندہ غاتیان فائدہ ہرفنہ۔ وزیراعظم پارے کہ موسمیاتی بدلی تا بابت بھاز انگا ملک آک مون آ ہنانو۔ چین دا چرجوئی ٹی بھاز کاریم کرینے۔ اوماحولیات دوست گرین سٹی اس جوڑ کرینے۔ نن چین آن پوسکن ءُ تکنیک ہیل کننگ کینہ۔ وزیراعظم پارے کہ مستین اٹ پاکستان اٹ اللہ نا تروک آ نعمت آتا قدر ءِ کننگتو۔ داسہ وخت بسنے کہ نن نعمت آتا قدر ءِ کین۔ پاکستان اٹ تدوک آ20سال اٹی مینگرووزاٹی نمان ودکی مسنے۔ تدوک آ60آن 70سال اٹی پاکستان اٹی جنگل آک بھس مسر۔ 2013ء ٹی ننا خیبرپختونخواحکومت اسہ ارب درخت خلنگ نا کاریم نا بناءِ کرے و اودے پورو کرے۔ وزیراعظم پارے کہ شجرکاری نا بابت داسہ آگاہی بسنے۔ اسکول نا چناتے ٹی دابابت آگاہی ستاکڑزک۔ تینا بروک آ چین تا زند ءِ گچین کننگ کن نیچربانڈ انا جاری کننگ جوان ءُ تصور اسے ولے ہراترندی اٹ دنیا ٹی موسمیاتی بدلی نا اثرمرتب مننگ ءِ 10سال اٹی شجرکاری نا بابت آگاہی بننگ ستاکڑزک۔ موسمیاتی بدلی تا بابت قصور ننا آخا ولے نسخان ننا مننگ ءِ۔ وزیراعظم پارے کہ جوبائیڈن انتظامیہ داسہ دابارواٹ سجفے ہراجوان ءُ ہیت اسے۔ تدوک آ انتظامیہ داکنڈآ چکار کتو۔ وزیراعظم پارے کہ پاکستان قائدانہ کڑد ادا کیک۔ خواجہ نبی کریم ﷺ 15سد سال مست داتصور ءِ تس کہ نم بروک آ دنیا کن ہمووڑ زند ءِ تیرکبو کہ پگہ نمے کہوئی ءِ ولے دادنیا کن ہمووڑ زند ءِ تیرکبو کہ نما ہزار سال زندہ سلوئی ءِ۔ داعظیم ءُ سوچ اس ئس۔ بدبختی اٹ نن داوڑسجفتون۔ 20سال مست جہانی باسنی آ ہیت کننگ آ مخلوق مخاکہ۔ بھلا ملک آک داچرجوئی ٹی سنجیدہ الورہ ولے کیلیفورنیا و آسٹریلیا ٹی موسمیاتی بدلی تا سوب آن لگوک آخاخر آن داسہ داسوچ بڑزاہنانے کہ دنیا قدرتی نعمت آتون انصاف کتنے۔ داسہ بل گیٹس ہم داڑآ ہیت کننگ ءِ۔
