اسلام آباد۔ 03جون (اے پی پی) وزیرخارجہ مخدوم شاہ محمود قریشی تون وفاق المدارس العربیہ نا سیکرٹری جنرل و پنی آ عالم دین قاری حنیف جالندھری پنچ شنبے نادے آ وزارت خارجہ ٹی اوڑدہی کرے۔ گپ وتران اٹی اتحاد بین المسلمین، بین المذاہب ہم آہنگی تون اوار تین پہ تینی است خواہی نا باندات آ گپ وتران مس۔ وزیرخارجہ پارے کہ ہندن کہ مسجد اقصیٰ غا جلہو نا واقعہ مون آ بس۔ وزیراعظم عمران خان نا کماشی ٹی نن، داظلم ءِ تورفنگ کن او آئی سی نا پلیٹ فارم آن سیجائی لائحہ عمل اس اختیار کننگ و پبی توار بڑزکننگ نا فیصلہ ءِ کرین۔ شاہ محمود قریشی پارے کہ او آئی سی نا ایگزیکٹو کمیٹی نا وخت آ ہلہلہ ئی دیوان ءِ بٹنگ نا بابت سعودی سرکڑدہ غاتا گام گیج ستاکڑزک۔ فلسطین نا باندات آ ”سیزفائر“ نا دروشم اٹ ننے بنائی مسخت اٹ سرسہبی دوئی مس۔ فلسطین نا بابت، اقوام متحدہ ہیومن رائٹس کونسل نا خصوصی دیوان اٹی او آئی سی نا کنڈآن پاکستان قرارداد پیش کرے و فلسطین اٹ انسانی حق انا لتاڑنگ نا آجوجاست وپاست کن کمیشن نا خواست کرے، اودے پیدوار ءُ گیشتری اسے اٹ منظور کننگا۔ قاری حنیف جالندھری پارے کہ کودک فلسطینی تیا برجااسرائیلی ظلم انا سوب آن مچ آ امت مسلمہ شدید اضطراب نا گواچی ئسر ہراوڑ پاکستان ترکی و ایلو اسلامی ملک آتون اواری اٹ اقوام متحدہ جنرل اسمبلی ٹی توار بڑزکریر اوستاکڑزک۔ قاری حنیف جالندھری مقبوضہ جموں و کشمیر اٹی برجا انسانی حق انا بھلا خلاف ورزی و بھارتی جارحیت ءِ گچین وڑاٹ جہانی فورم تیا ہرفنگ و گچین خارجہ پالیسی اس تینا کننگ آ وزیرخارجہ ءِ مبارکبادی تس۔
