اسلام آباد۔ 03جون (اے پی پی) وزیر خارجہ مخدوم شاہ محمود قریشی پارینے کہ پاکستان ڈیہہ ٹی امن و سوگوی کن کوشست کننگ ءِ، دابابت ننا اولیکو اولیت”اوغانستان“نا امن ءِ۔ پنچ شنبے نادے آ تینا اسہ بیان اسے ٹی شاہ محمود قریشی پارے کہ پاکستان، وزیراعظم عمران خان نا ویژن ءِ مون آ تخسا، ڈیہہ ٹی امن و سوگوی کن تینا کوشست آتے برجاتخانے، اوغانستان نا حالیت آتیا سجفنگ کن اینو پاکستان، چین و اوغانستان نا نیام اٹ ”سہ فریقی بیٹھک“ اس مننگ ءِ۔ اوپارے کہ چین اتون ٹیکنالوجی و ننتون مین پاور ءِ، امن نا دروشم اٹ، چین وپاکستان ہڑتوم آ ک اواری اٹ اوغانستان نا پوسکن تفنگ اٹ اہم ءُ کڑد اس ادا کننگ کیرہ۔ وزیرخارجہ پارے کہ ننا حکومت نا اولیت ”جیواکنامک“ ءِ۔ نن پاکستان ءِ واپاری سرجزآتا وت اس جوڑ کننگ خوانہ،دابابت ننا اکنامک کوریڈور و گوادر پورٹ اہم ءُ کڑد اس ادا کیک۔ وزیراعظم عمران خان نا کماشی ٹی ”نیامی ایشیائی ریاست آتا پوسکن آ ویژن“ آ عمل کننگ اُن۔ علاقائی رابطہ غاتا مون آ دننگ و علاقائی امن داوژن نا اِرابنداوی تمبہ ءُ، درو تاجک صدر ووزیرخارجہ تون، ہڑتوم آ کنڈآتا اقتصادی و زرگزرانی کمکاری و اوغانستان نا حالیت آتیا گپ وتران مس، اوغانستان اٹی امن نا بابت ننا و تاجکستان نا سوچ اٹی مماثلت ءِ۔ ہڑتوم آک اوغانستان اٹی امن ءِ ڈیہہ نا شونداری و سوگوی کن المی تکرہ۔ وزیرخارجہ پارے کہ کشمیریک، مودی سرکارنا اسہ کنڈی گام گیج ءِ یکسر مسترد کرینو۔ بھارت ءِ مقبوضہ کشمیر اٹی کروک آ اگست 2019نا غیر آئینی و اسہ کنڈی گام گیج آ نظرثانی کروئی مریک، وزیراعظم عمران خان داعزم انا درشانی ءِ کرے کہ نن کشمیری تا اخلاقی، سیاسی و سفارتی کمکاری ءِ برجاتخنہ۔
