اسلام آباد۔ 02جون (اے پی پی) وزیراعظم عمران خان پارینے کہ دنیا ٹی ملک آخاڈیہہ شون ہلیک، اقتصادی کمکاری ءِ ودفنگ و واپاراٹی آسانی آن ڈیہہ شون ہلیک۔ ای سی او ملک آتا 45کروڑ الس ناڈیہہ ءِ تین پہ تین سوگو کیر تو داپاور ہاؤس اس جوڑمریک، اوغانستان اٹی نزوری و بے چیٹی آن مچ آ ڈیہہ زہمی مریک۔ سیوتی فوج انا انخلاء آن پدپرامن انتقال اقتدار خوانہ، ای سی او ملک آک اوغانستان اٹی امن کن اسیجائی اٹ کوشست کیر، فلسطین و مقبوضہ کشمیر نا بابت اقوام متحدہ نا قراردادآتیا عملدرآمد مفننگ ءِ، دااِراڈیہہ ٹی انصاف مفننگ آن مخلوق ءِ بھاز تکلیف تون مون تروک ءِ، موسمیاتی بدلی نا اثرآتون مون تننگ کن دمدستی گام گیج کتون تو ڈیہہ و مچ آ دنیا ءِ خطرہ لاحق مریک۔اوداخیال آتا درشانی ءِ چارشنبے نادے آ داڑے ای سی او پارلیمانی اسمبلی ناارٹ میکو جنرل کانفرنس نا ایسری سیشن آن تران کرسا کرے۔ وزیراعظم ای سی او ملک آتا اسپیکرآتا کانفرنس نا اڈتننگ آ اسپیکر قومی اسمبلی اسد قیصر و اونا ٹیم ءِ مبارکبادی تس وکانفرنس اٹی بشخ ہلوک آتے پاکستان آ بننگ آ اوفتا منت واری ءِ ہرفے۔ وزیراعظم پارے کہ کانفرنس اٹی چارٹرنا منظوری آ غٹ بشخ ہلوک آتے خراج تحسین پیش کینہ، ای سی او نا 10ملک آتا نیام اٹ رابطہ نا مون آ دننگ کن کمیٹی تا جوڑ کننگ بھاز اہمیت تخک۔ دنیا ٹی ملک آخا ڈیہہ شون ہلیک، ای سی او ملک آتا ڈیہہ نا جم آبادی کم و ود 45کروڑ ءِ دااسہ بھلو آبادی اسے و داٹی بھاز لائخی ارے۔ اگہ نن تینا دا آبادی ءِ باہم مربوط کین، واپار ءِ ودفن و ویل آتے ایسرکین تو دا ڈیہہ پورو پاور ہاؤس اس جوڑ مریک۔ وزیراعظم پارے کہ ڈیہہ نا چندی ملک آتون چندی وسیلہ ارے، اگہ نن اواری اٹ کوشست کین تو داڑآن غٹ ءِ فائدہ مریک، یورپی یونین ءِ ہراتم جوڑ کننگا تو اوکان پد غٹ ملک آتا زند انا آب بڑز مس ہراتم کسٹم و ایلوڈیوٹی تیٹی کمتی مرے، اڑاند آتے مر کننگے تو داڑآن غٹ ملک آتے واپار اٹی فائدہ مریک۔ ننا ڈیہہ ٹی بھا ز زیات وارخواہی ارے،داڑے جوڑ مروک آ کمیٹی تیان بھاز فائدہ مریک۔ 2013ء آن پد داڑے اسہ بھلو خلا اس نظر بننگ ءِ ہراتم کمیٹیک کاریم کیرہ تو ای سی او ملک آک ہم اسہ ایلو نا خڑک بریرہ، پارلیمان تیٹی ویل آتا ایسر کشنگک، چندی باندات آ شرہ مریک، داکمیٹیک تینا تینا پارلیمان تیٹی چندی ویل آتیا شرہ کیرہ تو داڑآن اوفتاایسری ٹی کمک رسینگک۔وزیراعظم پارے کہ کانفرنس اٹ واپار و رابطہ تون اوار اوار سیاسی ویل آتیا ہم اسہ پیدوار ءُ موقف اس اختیار کننگانے۔ فلسطین و مقبوضہ کشمیرنا ویل آتون ننا جذباتی تعلقداری ءِ، ہموڑے ناانصافی نا سوب آن مخلوق آ ظلم مننگ ءِ و اوفتے اوفتا حق ملپننگ ءِ۔ اقوام متحدہ نا سلامتی کونسل اوفتا حق اٹ قرارداد منظور کرینے ولے اوفتیا عملدرآمد مفننگ ءِ ہرانا سوب آں مخلوق ءِ بھاز تکلیف آتون مون تروکءِ۔ کانفرنس اٹی قرارداد نا منظوری بھاز ستاکڑزوکءُ ہیت اسے۔ ویل اسے آ توار بے شک کم بڑز مرے ولے اوولدامچ آ دنیا ٹی تالان مریک۔ وزیراعظم پارے کہ ننا ڈیہہ ءِ ماحولیاتی بدلی نابھلوویل اس مون تروک ءِ و ہراملک آتے ٹی گلیشئر نا دیر دریاتیٹی کاہک اوفتے خطرہ ءِ کہ اگہ درجہ حرارت ہنداوڑ ودسا ہنا تو اوفتے کن مون آ دیر انا ویل ودساکاہک۔ پاکستان، تاجکستان، کرغزستان، ازبکستان و قازخستان ماحولیاتی بدلی نااثرآتون مون تننگ کن دمدستی گام گیج کتور و دنیا ٹی ماحولیاتی بدلی نا اثرآتون مون تننگ نا تحریک اٹ اوار متور تو داڑآن ڈیہہ و مچ آ دنیا ءِ خطرہ مریک۔ نن داتحریک نا بایدے بشخ مرین، پاکستان بھا زبھلو گام اس ہرفینے، 2013ء آن 2018ء اسکان نن خیبرپختونخواٹی اسہ ارب درخت خلکونن۔ داسہ نن داکان ہم بھلوہدف اس مقررکرینن و بروک آ پنچ سال اٹی مچ آ ملک اٹی 10ارب درخت خلنگک ہرافتیان اسہ ارب درخت خلنگانے۔ ماحولیاتی بدلی نا اثرآتے کم آن کم کننگ کن پورو کوشست کننگ اُن۔ ای سی او نا 10ملک آک داچرجوئی ٹی پبی کوشست کیر، انتئے کہ ننا نیمہ غان زیات ملک آک داماحولیاتی بدلی نا اثرآتیان بھاز زہمی مننگ کیرہ۔ وزیراعظم پارے کہ تاجکستان نا صدر تون اوڑدہی ٹی نن طے کرینن کہ اوغانستان آن امریکی و سیوتی فوج انا پدی ہِننگ آن پد پرامن انتقال اقتدار و سیاسی ایسری کن پورو کوشست کین انتئے کہ اوغانستان اٹی نزوری و بے چیٹی آن مچ آ ڈیہہ زہمی مریک۔ اوغانستان اٹی امن متو تو ڈیہہ نا ملک آتا نیام اٹ رابطہ ٹی ویل ودی مریک۔ ای سی او ملک آک اوغانستان اٹی امن و پرامن انتقال اقتدار کن پبی کوشست کیرو1989ء کون آ حالیت ودی مف ہراتم سوویت یونین نا فوج اوغانستان آن پدی ہنا تو ہموڑے ہراحالیت ودی مس۔ وزیراعظم پارے کہ ای سی او کانفرنس نا اڈتننگ آن اومیت ءِ کہ پارلیمان و پارلیمان نا باسک آتا نیام اٹ رابطہ غاتیانبار ہربشخ اٹ واپار، تعلیم ودودوربیدگ تون اوار ہربشخ اٹی کمکاری ءِ مون آ دننگ ملک و مچ آڈیہہ ءِ فائدہ مریک۔
