اسلام آباد۔ 02جون (اے پی پی) اسپیکر قومی اسمبلی اسد قیصر پارینے کہ اقتصادی کمکار تنظیم نا پارلیمانی اسمبلی نا کانفرنس نا اڈتننگ اسہ تاریخی ءُ سرسہبی اسے، بشخ ہلوک آک کشمیر اٹی انسانی حق انا خلاف ورزی تے امنا کریر۔ چارشنبے نادے آ اقتصادی کمکار تنظیم نا پارلیمانی اسمبلی نا ارٹ میکو جنرل اسمبلی نا ایسری دود آن تران کرسا اسپیکر پارے کہ علاقائی یکجہتی و شونداری کن پارلیمانی شریداری نا مون آ دننگ المی ءِ، ساڑی آ علاقائی و جہانی حالیت، خاص وڑاٹ کورونا نا دین انا رداٹ ارٹ میکو پائیکو کانفرنس نا سرسہبی اٹ اڈتننگ، پاکستان نا قومی اسمبلی کن شرف نا سوب ءِ۔ اسپیکر قومی اسمبلی پارے کہ کانفرنس اٹی بشخ ہلوک آ ڈل آتا منت واری ءِ ہرفیوہ و دا سرسہب اڈتننگ آ مبارکبادی ایتیوہ، کانفرنس نا سوب علاقائی شونداری و ڈیہہ نا الس نا شونہالی نا اسہ پیدوار ءُ لائحہ عمل اس مون آ بسنے، پائیکو نا ارٹ میکو کانفرنس علاقائی رابطہ و شریداری ءِ مون آ دننگ اٹ مزل نا نشان مریک۔ اسپیکر اسد قیصر پارے کہ کانفرنس نا غٹ بشخ ہلوک آتا کنڈآن امنائی وڑاٹ سال 2021-22کن کنے پائیکو تنظیم نا چیئرمین گچین کرینو ہرا کنکن شرف نا سوب ءِ، کانفرنس مسہ پارلیمانی کمیٹی جوڑ کننگ نا منظوری ءِ تسنے ہرا باسک ملک آتے ٹی واپار نا مون آ دننگ تون اوار زالبول و ورناتا قدرتی و دودوربیدگی باندات ءِ زیر غور اتیک۔ اسپیکر قومی اسمبلی پارے کہ کانفرنس نا اڈتننگ اسہ تاریخی ءُ سرسہبی اسے۔ داٹی غٹ باسک ملک آک جہانی و علاقائی ویل آتا ایسری کن اسہ وڑسوچ انادرشانی ءِ کریر۔ پائیکو نا ارٹ میکو کانفرنس امنائی وڑاٹ کشمیر نا مظلوم الس نا حق خودارادیت ءِ امنا کرے، کانفرنس اٹی بشخ ہلوک آتا کنڈآن کشمیر اٹی بھارتی ظلم و انسانی حق انا خلاف ورزی تا مذمت ءِ کریر۔ غٹ بشخ ہلوک آک کشمیر اٹی اقوام متحدہ نا قرارداد آتے مون آ تخسا کشمیر نا ویل انا ایسری آ امنا کریر۔ اسپیکر پارے کہ باسک ملک آک فلسطین نا ویل آن تینا قلبی تعلقداری نا درشانی ءِ کریر، ای سی او ءِ پین فعال و السی کہول آ گچین تنظیم ا س جوڑ کننگ کن کانفرنس اٹی پارلیمان تا کڑد انا تعین ءِ کننگا۔ کانفرنس اٹی وزیراعظم پاکستان نا بشخ ہلنگ اونا ڈیہہ نا الس نا شونداری و شونہالی ناعزم و پارلیمانی سفارتکاری تون وابستگی نا درشانی ءِ، بطور صدر پائیکو کانفرنس اٹی بشخ ہلنگ آ وزیراعظم نا منت واری ءِ ہرفنہ۔
