اسلام آباد۔ 02جون (اے پی پی) قومی احتساب بیورو (نیب) انا چیئرمین جسٹس جاوید اقبال پارینے کہ منی لانڈرنگ،شوگر، نت، جعلی اکاؤنٹس، واکداری تا ناروا کاریم اٹ اتنگ، کٹیاغان زیات میرات، غیرکانودی ہاؤسنگ سوسائٹی و مضاربہ اسکینڈل نا دوبہ دارآتے کانود نا رداٹ ایسری انجام اسکان سرکننگ نیب انا اولیت ءِ، پلی بارگین نا حتمی منظوری شرفدار احتساب عدالت ایتک۔ داخیال آتا درشانی ءِ او نیب انا ایگزیکٹیو بورڈ انا دیوان نا نیب ہیڈکوارٹرز اٹی کماشی ءِ کرسا کرے۔ دیوان اٹی ڈپٹی چیئرمین نیب، پراسیکیوٹر جنرل اکاؤنٹیبلٹی نیب، ڈی جی آپریشنز نیب و ایلو سینئر آفیسرآک بشخ ہلکر۔قومی احتساب بیورو نا ایگزیکٹیو بورڈ انا دیوان اٹی چندی کیس آتا جاچ ءِ ہلنگا، اوکان پد دیوان ءِ(پگہ) جمعہ اسکان پدبٹنگا۔قومی احتساب بیورو نا چیئرمین جسٹس جاوید اقبال پارے کہ ملک آن وڈی خوری نا چٹفنگ و وڈی خور آتیان کانود نا رداٹ ملک وقوم انا پلوک آ زرآتا پدی ہلنگ کن نیب سنبرینگوک ءِ۔ نیب منی لانڈرنگ، شوگر، نت، جعلی اکاؤنٹس، واکداری تا ناروا کاریم اٹ اتنگ، کٹیا غان زیات میرات، غیرکانودی ہاؤسنگ سوسائٹی و مضاربہ اسکینڈل نا دوبہ دارآتے کانود نا رداٹ ایسری انجام اسکان سرکننگ نیب انا اولیت ءِ۔ چیئرمین نیب پارے کہ پلی بارگین نا حتمی منظوری ءِ شرفمند آ احتساب عدالت ایتک۔ پلی بارگین اٹ دوبہ دار نئے بیرہ تینا ڈوہ ءِ امنا کیک بلکن ملک و قوم انا پلوک آ زرآتے ہم پدی ایتک۔نیب 2020ء ٹی 323ارب روپئی و تینا جوڑ مننگ آن داتم اسکان 814ارب روپئی وڈی خورآتیان بلواسطہ و بلاواسطہ وڑاٹ دوئی کرے ہراکہ اسہ ریکارڈ سرسہبی اسے۔
