اسلام آباد۔ 02جون (اے پی پی) وزیر مملکت حوالکاری و شینکاری فرخ حبیب پارینے کہ ای سی او کانفرنس ریجنل کنیکٹیویٹی وپارلیمانی سفارتکاری کن اہم ءُ کڑد اس ادا کیک، اگہ یورپی ملک آک اواری اٹ یورپین یونین جوڑ کننگ کیرہ تو نن انتئے؟ ڈیہہ نا غٹ ملک آک اواری اٹ نیزگاری، بے روزگاری، سیل و سوات تون اوار ایلو بشخ آتے ٹی اسیجائی حکمت عملی اس اختیارکیر۔ اوچارشنبے نادے آ ای سی او ملک آتا ارٹ میکو پارلیمانی کانفرنس اٹی بشخ ہلنگ آن پد میڈیا تون گپ وتران کریکہ۔ وزیر مملکت فرخ حبیب پارے کہ ہراتم ڈیہہ نا پارلیمانک اوار تولرہ تو اونا اثرآک ہم مثبت مریرہ، آخبت اٹ داڑے پوسکن ءُ زرگزرانی بلاک اس ہم جوڑ مننگ کیک۔ اوپارے کہ کوویڈ۔ 19آن پد ہم سرسہب کانفرنس نا اڈتننگ نا کریڈٹ اسپیکر قومی اسمبلی اسد قیصر و ڈپٹی اسپیکر قاسم سوری ءِ کاہک۔ اوپارے کہ علاقائی و پارلیمانی سفارتکاری ٹی پاکستان نا کڑد اہم ءِ۔
