اسلام آباد۔ 24مارچ (اے پی پی) وزیراعظم محمدنواز شریف پارینے کہ پاکستان و سری لنکا سارک انا مسخت آتا دوئی کن اواری اٹ کاریم کننگ کیرہ۔ اوداہیت ئِ جمعہ نا دے داڑے وزیراعظم ہاﺅس اٹی پاک سری لنکا فرینڈ شپ ٹریڈ اینڈ انوسٹمنٹ ایسوسی ایشن نا صدر افتخار عزیز تون اوڑدہی ٹی پارے ہراصدر مملکت نا کنڈآن تمغہ خذمت نا اعزاز تننگانے۔ ایسوسی ایشن نا نائب صدر و سیکرٹری جنرل ہم افتخار عزیز تون اوار ئسر۔ وزیراعظم محمدنواز شریف تینا سری لنکن ہم منصب رانیل وکراماسنگھے تون جہانی اقتصادی فورم نا وخت آ مروک آ اوڑدہی نا ذکر ئِ کرسا پارے کہ پاکستان و سری لنکا سارک انا مسخت آتا دوئی کن اواری اٹ کاریم کننگ کیرہ۔ اوپارے کہ ہڑتوم آ ملک آتے آزادانہ واپار معاہدہ نا پبی کچ آن بایدے فائدہ ہرفوئی مرے۔ اوپارے کہ ساڑی حکومت زرکارآتے جامع آسراتی و کٹیا نا رکھ فراوان کرینے ہرا شونداری ڈٹ جاٹ انا رفتار آتیان پاش ئُ۔ وزیراعظم پاکستان نا بصارت آن محروم بندغ آتے کن خن تا قرنیہ نا گرانقدر عطیہ غاتیا افتخار عزیز نا خذمت آتا ستائِ کرے۔ افتخار عزیز وزیراعظم و وزیراعلیٰ پنجاب ئِ قرنیہ نا 10، 10 و گورنر خیبر پختونخوا ئِ 5 عطیہ پیش کننگ ئِ۔ افتخار عزیز یخین ترفے کہ او بروک آ اِرا ہفتہ غاتیٹی پین قرنیہ فراوان کیک۔ وزیراعظم افتخار عزیز ئِ صدر مملکت نا کنڈآن تمغہ خذمت ایوارڈ ملنگ آ مبارکبادی ترسا پارے کہ دا ہڑتوم آ ملک آتا نیام اٹ سنگتی ، واپار و زرکاری نا مون آ دننگ نا بابت اونا شاندار خذمت آتا اعتراف ئِ۔
