اسلام آباد۔ 02جون (اے پی پی) وزیراعظم عمران خان پارینے کہ تاجکستان تون واپار تون اوار چندی بشخ آتے ٹی کمکاری آ گپ وتران مسنے، ڈیہہ نا شونداری و امن کن اوغانستان اٹی تنازعہ نا پرامن ایسرالمی ءِ، ماحولیاتی کچٹی نا باندات آ پاکستان و تاجکستان ملک اٹ توار بڑزکیرہ، بھارت نا کشمیر آ 5 اگست نا گام گیج ڈیہہ نا امن کن خطرہ و شونداری نا کسر اٹ اڑاند اسے۔ چارشنبے نادے آ تاجکستان نا صدر امام علی رحمان تون اوار اسیجائی پریس کانفرنس آن تران کرسا وزیراعظم عمران خان پارے کہ تاجکستان نا صدر ءِ بخیر اٹ پاوہ۔ اوداکان مست ہم پاکستان آ بسنے۔ وزیراعظم پارے کہ داہم اتفاق ءِ کہ کنا و تاجکستان نا صدر نا ودی دے انا تاریخ اسٹ ءِ۔ نن اینو بھاز انگا باندات آتیا گپ وتران کرین۔ اوفتے ٹی واپارغٹ آ ن اہم ءِ۔ ہڑتوم آ ملک آتا نیام اٹ واپاری تعلقداری تا مون آ دننگ کن ایم او یو آ دستخط مسنے ہراڑآن ہڑتوم آ ملک آتا نیام اٹ واپاری تعلقداری ودک۔ گوادر آن تاجکستان ہم پبی فائدہ ہرفنگ کیک۔ داڑآن ننا تین پہ تینی واپاری تعلقداری ہم سوگو مریک۔ وزیراعظم پارے کہ تعلیم، دودوربیدگ و دفاع نا بشخ آتے ٹی ایم او یوآ دستخط مسنے۔ تاجکستان ءِ پاکستان اٹ جوڑ مروک آ سلہہ غاتون ہم است خواہی ارے۔ نن دفاع نا بشخ اٹی ہم تینا تعلقداری تے ودفنہ و دابابت پین گپ وتران ہم کینہ۔ وزیراعظم پارے کہ پاکستان و تاجکستان ءِ اسہ وڑنا چیلنج مون تروک ءِ۔ ہڑتوم آ ملک آتا نیام اٹ واپاری رابطہ غاتا مون آ دننگ کن اوغانستان اٹی امن بھازاہمیت تخک۔ ننے گڑتی ءِ کہ اوغانستان اٹی سیاسی ایسر اس پیش تمنگ نا دروشم اٹ نن ہم زہمی مرینہ و ڈیہہ تون ننا واپار ہم زہمی مریک و دہشت گردی ٹی ہم ودکی مریک۔ اوغانستان آن ہرادہشت گرد آک داڑے بریرہ پناہ ہلیرہ نا کچ ہم ودنگ کیک۔ تاجکستان ءِ ہم ہنداگڑتیک ءُ۔ ہنداخاطرآن ہڑتوم آ ملک آتا است خواہی ءِ کہ اوغانستان اٹی ہراتم درملکی فوج انا انخلامرے تو اسہ ہندن ءُ سیاسی حکومت اس مرے ہرا بے چیٹی ءِ توننگ کے و امن قائم مرے۔ جہانی کمکاری آن اوغانستان اٹی پرامن سیاسی ایسری المی ءِ۔ تاجکستان نا صدر تون دابابت گپ وتران مسنے۔ وزیراعظم پارے کہ مسٹ میکو چیلنج ہراہڑتوم آ ملک آتے مون تروک ءِ، او ماحولیاتی بدلی نا بابت ءِ۔ ہڑتوم آ ملک آتا سیبو گلیشئر آن دوئی مروک آ دیر آٹے۔ وزیراعظم پارے کہ تاجکستان نا صدر کنے پارینے کہ اونا اسہ ہزار گلیشئر دیر مسنو وخت اس کہ ننا ہم 80 درسد دیر گلیشئر آن بریک و گلوبل وارمنگ آن کاربن نا اخراج آن ماحولیات ءِ بھاز خطرہ ءِ۔ مچ آ دنیا ءِ اواری اٹ گلوبل وارمنگ ءِ توننگ کن گام گیج کروئی مریک۔ نن دابابت ہم گپ وتران و اواری اٹ توار بڑز کینہ۔ وزیراعظم پارے کہ ڈیہہ ٹی ساڑی وارخواہی تیان ہموتم آ فائدہ ہرفنگ مریک ہراتم ڈیہہ ٹی امن مرے۔ بھارت 5 اگست 2019آ کشمیر نا بابت ہرااسہ کنڈی گام گیج ءِ کرے جہانی کانود و اقوام متحدہ نا سلامتی کونسل نا قراردادآتیان چپ ءِ۔ بھارت تون واپاری تعلقداری 5 اگست نا گام گیج آتے پدی ہلنگ اسکان قائم مننگ کپک۔ بھارتی گام گیج آک ڈیہہ نا امن کن خطرہ ءُ۔ وزیراعظم پارے کہ پاکستان نا بھلو اسٹریٹجک اہمیت اسے۔ پاکستان مچ آ علاقہ ءِ کنیکٹ کننگ کیک۔ بھارت نا رویہ نا سوب آن مچ آ ڈیہہ نا شونداری زہمی مننگ کیک۔ اوپارے کہ تاجکستان نا صدر تون اسلاموفوبیا نا باندات آہم گپ وتران مس۔ اوپارے کہ اسلاموفوبیا نا سوب آن مسلمان تے خاص وڑاٹ دیکی ٹی بھاز مشکل مون تروک ءِ۔ اسلاموفوبیا نا غٹ آن بھلا سوب آجوئی سلاہ درشانی نا آڑ اٹ خواجہ نبی کریم ﷺ نا ناموس اٹ گستاخی و اسلام ءِ دہشت گردی تون گنڈنگ ءِ وخت اس کہ پین مذہب اسے نا تعلق ءِ دہشت گردی تون گنڈنگپک۔ وزیراعظم پارے کہ 2025ء آ گلیشئر نا دیر مننگ نا بابت آگاہی و اونا رکھ انا سال انا وڑاٹ اڈتننگک۔ وزیراعظم پارے کہ تاجکستان تون کرپشن نا توننگ کن ادارہ جاتی کمکاری نا بابت ہم گپ وتران مسنے۔ اقوام متحدہ نا ادارہ نا رپورٹ نا رداٹ ہرسال اسہ ہزار ارب ڈالر پدتموک ملک آتیان شون ہلوک ملک آتے ٹی گدریفنگک۔ نزور لیگل سسٹم نا سوب آن نیزگار ملک آتا دولت ءِ پلسا ہزگار ملک آتیا گدریفنگک۔ دابابت گام گیج نا گرج ءِ۔ داوخت آ تاجکستان نا صدر امام علی رحمان پارے کہ او دورہ نا سلہ خلنگ و شاندار بیابخیر کننگ آ وزیراعظم عمران خان نا منت واری ءِ ہرفک۔ اینونااوڑدہی بھاز خوشگوار چاگڑد اٹی مس۔ داڑآن تین پہ تینی ہم آہنگی ٹی ودکی مس۔ ڈل آتا کہول آہم تعمیری گپ وتران مس ہراڑآن ہڑتوم آ ملک آتا نیام اٹ کمکاری و دوستانہ تعلقداری ٹی ودکی مریک۔ اوپارے کہ پاکستان تون ننا تعلقداری دوستانہ وتین پہ تینی پت آٹی ءِ۔ تاجکستان پاکستان ءِ تینا اہم ایلم ملک تکک۔ پاکستان تون واپار تون اوار چندی بشخ آتے ٹی کمکاری نا خواہندار اُن۔
