اسلام آباد۔ 02جون (اے پی پی) اسپیکر قومی اسمبلی اسد قیصر تون چارشنبے نادے آ پیکو کانفرنس اٹی بشخ ہلنگ کن بروک آ تاجکستان ایوان نمائندگان نا اسپیکر زوکرذودہ محمد طاہر اوڑدہی کرے ہراٹی ہڑتوم آ کنڈآتا تعلقداری، پیکو کانفرنس نا کڑد ءِ فعال کننگ و تین پہ تینی است خواہی نا ایلو باندات آ گپ وتران کننگا۔ اسپیکر پارے کہ پاکستان و تاجکستان دودوربیدگ، تاریخ و اخوت نا بے مٹ رشتہ غاتے ٹی تفوک ءُ۔ پیکو کانفرنس باسک ملک آتے ٹی تین پہ تینی کمکاری و شریداری نا پوسکن ءُ کسر پٹنگ اٹ کمکار جوڑ مریک۔ پاکستان اٹی پیکو کانفرنس نا اڈتننگ باسک ملک آتا نیام اٹ تعلقداری تے ودفنگ اہم ءُ پیش رفت اس جوڑ مریک۔ اوپارے کہ کشمیری و فلسطینی الس آ کروک آ ظلم بھاز است ہسونی و مذمت نا قابل ءِ۔ پاکستان کشمیری و فلسطینی الس نا سفارتی و اخلاقی مخ تفی ءِ برجاتخک۔ تاجکستان نا اسپیکر پارے کہ پارلیمانی ڈل انا جم و جوش اٹ بخیر آ پاکستان نا الس و پارلیمنٹ نا منت وار اُٹ۔ پاکستان و تاجکستان نا نیام اٹ ہڑتوم آ کنڈآتا تعلقداری و علاقائی کمکاری ءِ مون آ دننگ آ امنا کننگا۔ تاجک اسپیکر پارے کہ ڈیہہ نا ملک آتے ٹی تین پہ تینی کمکاری نا وارخواہی پٹنگ ڈیہہ نا شونداری و شونہالی کن المی ءِ۔ کشمیرنا ویل و فلسطین آ پیکو ملک آتا نیام اٹ مشترک حکمت عملی وخت انا اہم ءُ گرج اسے۔ ہڑتوم آ ملک آتا پارلیمانی فرینڈ شپ پڑک ءِ پین فعال جوڑ کننگ نا گرج ءِ۔
