اسلام آباد۔ 02جون (اے پی پی) صدر مملکت ڈاکٹر عارف علوی پارینے کہ عالم دین و مشائخ آک تدوک آ 14سد سال آن زیات وخت آن خدا و اونا رسول ﷺ نا کلہو ءِ الس اسکان سرکننگ ءُ، اسلام نا بقامنبر و محراب تون گنڈوک ءِ، اہم راجی و معاشرتی ویل و سرحال آتیا الس نا راہشونی ءِ کننگ عالم دین و مشائخ آتا فرض ءِ، عالم دین و مشائخ، میڈیا، سول سوسائٹی، حکومت و خاص وڑاٹ این سی او سی نا مربوط پالیسی نا نتیجہ ٹی ایلو ملک آتا مقابلہ ٹی پاکستان کوویڈ۔ 19نا جوان مقابلہ ءِ کرینے، کورونا دین کون آ دین انا توننگ نا بابت قرآنی تعلیمات آتیان الس نا آگاہی عالم دین تا فرض ءِ، منبر ومحراب آن جوان انگا ہیت آتا پنت تننگ نا گرج ءِ، کورونا ویکسین نا تیاری و اوٹی اوار گڑاتا بارواٹ عالم دینک است جم ءُ، اوتینٹ ہم ویکسین خلفینو، و 4جون 2021آ جمعہ نا خطبہ غاتے ٹی کورونا دین آن رکھ اکن ویکسین نااہمیت و گرج انا بارواٹ الس ءِ آگاہی فراوان کننگک۔ صدر مملکت ڈاکٹر عارف علوی چارشنبے نادے آ مچ آ ملک انا عالم دین و مشائخ آتا ویڈیو لنک انا کمک اٹ اڈہلوک دیوان اٹی کورونا ویکسین نا اہمیت و اونا بارواٹ الس اٹ شعور تالان کننگ نا بابت محراب ومنبر نا کڑد انا سلابتی دیوان آن تران کرسا پارے کہ ملک اٹی اہم باندات آتیا یکجہتی آ حکومت عالم دین و مشائخ آتا منت وار ءِ۔ یکجہتی نا بنامنبرومحراب آن مس ہرانا نتیجہ ٹی الس نا پت بحال مس۔ اوپارے کہ ملک اٹی ملی یکجہتی کن عالم دینک پبی کمک کریر۔ صدر مملکت پارے کہ کوویڈ۔ 19نا مقابلہ ءِ کننگ کن عالم دین ومشائخ، میڈیا، سول سوسائٹی، حکومت و این سی او سی نا مربوط پالیسی نا نتیجہ ٹی پاکستان ایلو ملک آتا مقابلہ ٹی گچین سرسہبی دوئی کرینے و دا نما کمک آن بیدس ممکن الوکہ۔
