اسلام آباد۔ 02جون (اے پی پی) مچ آ ملک انا عالم دین و مشائخ عظام کورونا دین آن رکھ انا ویکسین نا اہمیت ءِ تالان کننگ آ امنا کرینو، صدر ڈاکٹر عارف علوی تون سلابتی نشست اٹی اسہ اعلامیہ اس ہم جاری کننگا۔ صدر ڈاکٹر عارف علوی تون مچ آ ملک انا جید عالم دین و مشائخ عظام تا کورونا ویکسین نا بابت اہم انگا نشست نا بست وبند ءِ چارشنبے نادے آ کننگا۔ سلابتی سیشن اٹ بنجائی وزیر مذہبی امور و بین المذاہب ہم آہنگی پیر نورالحق قادری، چیئرمین اسلامی نظریاتی کونسل ڈاکٹر قبلہ ایاز ئسک بشخ ہلکر وخت اس کہ گورنر بلوچستان، گورنر گلگت بلتستان آن بیدس ہرچار آ صوبہ غاتا عالم دین، آزاد کشمیر و گلگت بلتستان نا عالم دینک ہم ویڈیو لنک انا کمک اٹ سلابتی سیشن اٹ بشخ ہلکر۔ ایوان صدر میڈیا ونگ انا کنڈآن جاری پریس ریلیز نا رداٹ سلابتی دیوان اٹی حسب ذیل ٹک آتیا امنا کننگا۔ اعلامیہ ٹی پاننگانے کہ الس نا جان و جان جوڑی نا رکھ مسخت دین و شریعت آن اسہ مسخت ءِ۔ ہنداوڑ پاننگانے کہ کورونا اسہ دینی ءُ مرض اسے ہرانا توننگ و درمان نا بست وبند ءِ کننگ بیرہ شریعت نا خواست آخا بلکن پرمان ہم ارے۔ کورونا دین آن لکھ آ مخلوق زوال کرینے۔ جان جوڑی نا ماہر آک ہم دانا آخبتی توننگ کن ویکسین خلفنگ آ زور شاغنگ ءُ۔ عالم دین و مشائخ آک ہم جان جوڑی نا چاہندار آتا سلاہ ءِ اہمیت ایترہ۔ داکان بیدس کورونا ویکسین نا کاریم اٹ اتنگ نا ترغیب عالم دین و مشائخ عظام نا فرض منصبی آن ءِ۔
