اسلام آباد۔ 02جون (اے پی پی) وزیر خارجہ مخدوم شاہ محمود قریشی پارینے کہ پاکستان، تاجکستان تون ہڑتوم آ کنڈآتا تعلقداری تے پین سوگو کننگ کن سنبرینگوک ءِ۔ کاسا 1000کون آاہم ڈٹ آتا وخت آ پوروی، سویلی و نیامی ایشیانا نیام اٹ توانائی راہداری نا جوڑ کننگ اٹ کمکار جوڑ مریک، پاکستان، اوغانستان تون اوار ڈیہہ ٹی امن کن تینا مخلصانہ کوشست آتے برجاتخک۔ داہیت ءِ او چارشنبے نادے آ پاکستان نا اِرادے ئی دورہ غا بروک آ تاجک صدر امام علی رحمان تون اوڑدہی ٹی پارے۔ سیکرٹری خارجہ سہیل محمود وتاجکستان اٹی پاکستان ناسفیر عمران حیدر ئسک ہم داوخت آ ساڑی ئسر۔ وزیر خارجہ تاجکستان نا صدر امام علی رحمان ءِ پاکستان آ بننگ آ بخیر اٹ پارے۔ اوڑدہی ٹی ہڑتوم آ کنڈآتا تعلقداری، چندی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا باندات آ گپ وتران کننگا۔ وزیر خارجہ تینا ساڑی آ دورہ تاجکستان اٹی مروک آ اوڑدہی نا حوالہ ءِ ترسا پارے، ہارٹ آف ایشیااستنبول پراسس دیوان نا سرسہب اڈتننگ پبی مہمانداری آ تاجک صدر نا منت واری ءِ ہرفے وپارے کہ پاکستان و تاجکستان نا نیام اٹ تاریخی ایلمی تعلقداری ءِ ہرااسہ وڑ مذہبی، تہذیبی و دودوربیدگی بنداوتیاٹی ءِ۔ پاکستان، تاجکستان تون ہڑتوم آ کنڈآتا تعلقداری تے پین سوگو کننگ کن سنبرینگوک ءِ۔ شاہ محمود قریشی پارے کہ ستاکڑزوک ہیت دادے کہ ہڑتوم آ ملک آتا بڑزکو سرکڑدہ، داہڑتوم آ کنڈآتا تعلقداری تے پین ودفنگ و سوگو کننگ کن کوشست کننگ ءُ۔ پاکستان وتاجکستان نا نیام اٹ ہڑتوم آ کنڈآتا واپاری تعلقداری تے ودفنگ و کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ نا بابت بھلو وارخواہی اس ساڑی ءِ۔ پاکستان و تاجکستان نا نیام اٹ،تعلیم، ہاؤسنگ، انفراسٹرکچرڈویلپمنٹ، ٹیکنالوجی و توانائی تون اوار بھاز انگا بشخ آتے ٹی ہڑتوم آ کنڈآتا کمکاری ءِ ودفنگ کن سنبرینگوک ءِ۔ وزیر خارجہ تاجک صدر ءِ اوغانستان اٹی امن کن پاکستان نا خیرخواہی کوشست و اوفتا بھرم آتیان معلومدار کرے و پارے کہ پاکستان، ڈیہہ نا شونداری و شونہالی کن اوغانستان اٹی دیرپاامن ءِ المی تکک۔ اوغانستان اٹی امن کن تاجکستان نا کوشست ستاکڑزک۔ شاہ محمود قریشی پارے کہ پاکستان، اوغانستان تون اوار ڈیہہ ٹی امن کن تینا مخلصانہ کوشست آتے برجاتخک۔ تاجک صدر جم و جوش اٹ بخیر و عمدہ مہمانداری آ وزیرخارجہ وپاکستان نا سرکڑدہ غاتامنت واری ءِ ہرفے۔
