اسلام آباد۔ 02جون (اے پی پی) وزیراعظم نا خصوصی کمکار تخفیف غربت پروگرام سینیٹر ڈاکٹر ثانیہ نشتر پارینے کہ وزیراعظم عمران خان نیزگاری نا چٹفنگ و سیل و سوات نا مون آ دننگ کن گام گیج کننگ اٹی ءِ، داچرجوئی ٹی ریاست مدینہ نا تصور ءِ مون آ تخسا تعلیم، جان جوڑی، نیزگاری نا چٹفنگ تون اوار ایلو بشخ آتے ٹی نیزگار و نادار تپہ غاتا آسراتی کن احساس پروگرام نا بناءِ کننگانے۔ چارشنبے نادے آ پائیکو کانفرنس نا ارٹ میکو دے ٹورازم نا مون آ دننگ و نیزگاری نا چٹفنگ نا بابت سیشن آن تران کرسا اوپارے کہ بروک آ ہفتہ نن راجی رکھ انا بابت ون ونڈو آپریشن نا رداٹ پروگرام اس درستی راستی کرفنگ اُن۔ حکومت پائیدار اقتصادی شونداری، آبادی نا مون ءِ توننگ، انسانی وسیلہ غاتا شونداری کن ورناتے کسبکار کننگ کن پروگرام تیا چکار کننگ ءِ۔ اوپارے کہ کورونا دین اٹی بے روزگار و نیزگار تپہ غاتا نغد زرانا حالیت اٹ مالی کمک ءِ کننگا۔ اوپارے کہ ٹورازم نا مون آ دننگ آن نیزگاری نا چٹفنگ اٹ کمک رسینگک۔ ہندی مخلوق ءِ روزگار ملک تو اقتصادی حالیت گچین مریک۔ اوپارے کہ پاکستان اٹی ہزار آ کلومیٹر نا کرک ءِ۔ داڑے ارٹ میکو بھلا ٹل ءِ۔ مذہبی سیل و سوات نا بابت ہندآک ءُ۔ سیل و سوات نا بشخ انا شونداری کن حکومت اولیتی بنداو تیا گام گیج کننگ ءِ۔ نن 2020آن 2030اسکان قومی سیل و سواتی پروگرام اس جوڑ کرینن۔ داچرجوئی ٹی 190ملک آتے ای ویزہ نا آسراتی و 50 ملک آتے ملک اٹ بننگ آ ویزہ جاری کننگ نا آسراتی تننگک۔ اوپارے کہ ترکی ٹی سیل و سوات نا بشخ انا اونا زرگزران اٹ اسہ بھاز بھلو بشخ اسے۔ ڈاکٹر ثانیہ نشتر پارے کہ کورونا دین انا حالیت آتا سوب آن مچ آ دنیا ٹی سیل و سوات اٹی جی ڈی 10.5درسد آن کم مرسا 5.5درسد اسکان بسنے۔ پاکستان نا حکومت کورونا دین انا حالیت آتا مون ءِ توننگ کن گچین گام گیج کننگ ءِ۔ اوکانفرنس اٹی بشخ ہلوک آتا خاص منت واری ءِ ہرفے۔ اوغان باسک پارلیمنٹ شنکائی کاروخیل پارے کہ کورونا دین انا سوب آن مچ آ دنیا نا بے شمار مخلوق زوال کرینو، جہانی کہول آ دادین آن رکھ اکن گام گیج کننگ انگ ءِ۔ اوداہیت آ زور شاغا کہ ای سی او باسک ملک آتے اواری اٹ اقتصادی رابطہ و واپار نا مون آ دننگ کن اسہ ایلو تون اواری اٹ کاریم کروئی مریک۔ اوپارے کہ ڈیہہ نا باسک ملک آتا کنڈآن سیل وسوات نا بشخ انا شونداری کن اسہ ایلونا آزموندہ غاتیان فائدہ ہرفسا دابشخ ءِ شون تننگ مریک۔ دابابت ننے اسیجائی وڑاٹ اسہ سوگو حکمت عملی اس جوڑ کروئی مریک۔ ننا سلاہ و سوج آتے باسک ملک آتا نیام اٹ اسیجائی معاہدہ نا وڑاٹ کانفرنس نا اعلامیہ نا بشخ جوڑ کننگے۔ اوپارے کہ جہانی کہول آ دہشت گردی نا خطرہ نا سوب آن کودک انسانک زوال کیرہ۔ اوغانستان بھاز بے وڑ دہشت گردی نا گواچی مسنے۔ دہشت گردی ءِ چٹفساہم سیل و سوات نا بشخ ءِ شون تننگ مریک۔ ای سی او باسک ملک آتے دہشت گردی و انتہاپسندی نا چٹفنگ کن اواری اٹ گام گیج کروئی مریک۔ اگہ داوڑکننگتو تو دہشت گردی ڈیہہ نا شونداری نا کسر اٹ اسہ بھلو اڑاند اس جوڑ مریک۔ سیشن آن آذربائیجان تون اوار ایلو باسک ملک آتا پارلیمنٹرین آک ہم تران کریر و داہیت آ زور شاغار کہ ڈیہہ نا باسک ملک آتے سیل و سوات نا مون آدننگ، کورونا دین انا مون ءِ توننگ و دہشت گردی نا عفریت آن نجات دوئی کننگ کن اسیجائی کوشست کروئی مریک۔
