راولپنڈی۔ 02جون (اے پی پی) وزیر مملکت موسمیاتی بدلی زرتاج گل وزیر پارینے کہ مستین نا حکمرانک ڈغارتیاکوزہ کرساکریر ہراسوب آن اینو نا سیاستدان نا احتساب مشکل مسنے، پاکستان تحریک انصاف تینا پنچ فلیگ شپ پروگرام تا بناء آ بروک آ گچین کاری تیٹی بشخ ہلیک، وزیراعظم عمران خان نا وژن و ساڑی حکومت سرسہب ورناپروگرام نا کمک اٹ زالبول آتے شونداری نا کسر آ درسا دانعرہ ءِ حقیقت اٹ بدل کرینے، وزیراعظم عمران خان ناحکومت اٹ کرپٹ سیاست دان تا احتساب بناکرینے، اسہ وڑنصاب و یونیفارم آ زوت عملدرآمد مریک۔ موسمیاتی بدلی نا ڈٹ آتے سرسہب کننگ کن 20 درخت خلوک آ طالب علم آتے امتحان تے ٹی بیست ودکی نمبر تننگک۔ داخیال آتا درشانی ءِ زرتاج گل وزیر چارشنبے نادے آ فاطمہ جناح وویمن یونیورسٹی ٹی سرسہب ورنا پروگرام نا دود آن تران کرسا کرے۔ داوخت آ وزیراعظم نا خصوصی کمکار عثمان ڈار، فاطمہ جناح وویمن یونیورسٹی نا وائس چانسلر ڈاکٹر صائمہ حمید، نیشنل ووکیشن اینڈ ٹیکنکل ٹریننگ کمیشن نا ایگزیکٹیو ڈائریکٹر ناصر خان، بینک آف پنجاب و فرسٹ وویمن بینک انا آفیسر آتون اوار طالب علم آتا بھلو کچ اس ساڑی ئسر۔ وزیر مملکت موسمیاتی بدلی زرتاج گل وزیر نا پاننگ ئس کہ فاطمہ جناح یونیورسٹی ٹی چارمیکو وار دورہ ءِ کرینے۔ اوطالب علم آتیان تران کرسا پارے کہ اونا علاقہ ٹی زالبول دیر اکن کیہی کلومیٹر پند سفر کیرہ انتئے کہ دازالبول آتے ہمو آسودہی اف ہراننتون ارے۔ ننا ملک اٹی لمہ و باوہ سخت محنت ومزوری کرسا تیناچناتے تعلیم خوانفرہ۔ اوپارے کہ تدوک آ حکومت آتے ٹی زالبول آتے ملکی شونداری ٹی اتنگ اسہ نعرہ اس ئس ولے وزیراعظم عمران خان نا وژن و ساڑی حکومت سرسہب ورناپروگرام نا کمک اٹ زالبول آتے شونداری نا کنڈآدرسا دانعرہ ءِ حقیقت اٹ بدل کرینے۔ زرتاج گل وزیر پارے کہ غٹ آن مست تینا مسن تے تعلیم ایتفر انتئے کہ دنیا داوخت آ بھاز مون آ ہنانے ہرانا مقابلہ ءِ کننگ کن مسن تا خواننگ و پوسکن ءُ مہارت ہیل کننگ بھاز المی ءِ، زرتاج گل پارے کہ سیاست ءِ مخلوق جوان پاپک انتئے کہ مستین نا سیاست دانک ملک اٹ کرپشن و لٹ وپل کریر ولے وزیراعظم عمران خان نا حکومت کرپٹ سیاست دان تا احتساب نا بناءِ کرینے و خوانوک آ ورناتے مرے کہ تینا وونٹ انا زور اٹ جوان انگا مخلوق ءِ مون آ اتیر و اگہ وونٹ تفسہ تو ہمو کرپٹ مخلوق ننا کاٹم تیا ولدا تولک۔ اوپارے کہ پاکستان تحریک انصاف بروک آ گچین کاری تیٹی احساس پروگرام و سرسہب ورناپروگرام کون آ ڈٹ آتا بنداو آ بشخ ہلیک و سرسہبی دوئی کیک۔ اوطالب علم آتیان تران کرسا پارے کہ تعلیمی آب ءِ گچین کننگ کن اسہ وڑنصاب ویونیفارم آ زوت عملدرآمد مریک وخت اس کہ موسمیاتی بدلی نا ڈٹ آتے سرسہب کننگ کن 20 درخت خلوک آ طالب علم آتے امتحان تیٹی بیست ودکی نمبرتننگک۔وزیراعظم نا خصوصی کمکار امور نوجوانان عثمان ڈار فاطمہ جناح وویمن یونیورسٹی ٹی طالب علم آتیان تران کرسا پارے کہ پنچ درسد ورنانیورسٹی آ سرمریرہ و سرسہب ورناپروگرام نا رداٹ دافیصلہ مشکل ئس کہ ورناتے ہراوڑنا تربیت تننگے۔ اوپارے کہ وزیراعظم عمران خان نا وژن آ کاریم کرسا سرسہب ورناپروگرام نامسخت ورناتے کن روزگار نا وارخواہی ودی کننگ ئس، اوپارے کہ داپروگرام نا رداٹ سد ارب روپئی آن 25 ارب زالبول آتے کن تخنگا و داتم اسکان یک و نیم ارب روپئی زالبول آتے ٹی بشخنگانے۔
