لاہور۔ 02جون (اے پی پی) گورنر پنجاب چوہدری محمد سرور نا امریکی ریاست کیلی فورنیا نا اسمبلی گیلری ٹی ساڑی گری ٹی غٹ جماعت آتا پارلیمانی لیڈرآک کیلی فورنیا و پنجاب ءِ سسٹر سٹیٹس گوندنگ نا بل کیلی فورنیا اسمبلی ٹی منظوری کن پیش کریر۔ بروک آ ہفتہ بل انا باقاعدہ منظوری ءِ تننگک۔ گورنرہاؤس لاہور آن جاری اعلامیہ نا رداٹ گورنر پنجاب چوہدری محمد سرور دورہ امریکہ ٹی کیلی فورنیا نا اسپیکر اینتھنی رینڈن و ایلوپارلیمانی جماعت آتا لیڈڑ و اسمبلی نا باسک آتون اوڑدہی کرے ہرافتے ٹی پاک امریکہ تعلقداری، امریکی ریاست کیلی فورنیا وپنجاب ءِ سسٹر سٹیٹ گوندنگ، فلسطین نا ویل و کشمیر اٹی برجا ظلم اتون اوار ایلو باندات آتا بارواٹ گپ وتران کننگا۔ لاس اینجلس اٹ پاکستانی قونصل جنرل عبدالجبار و ڈیموکریٹک باسک آصف محمود تون اوار ایلوفک ہم گورنر پنجاب تون اوار ئسر۔ داوخت آ امریکی ریاست کیلی فورنیا نا غٹ جماعت آتا پارلیمانی لیڈر آک امریکی ریاست کیلی فورنیا وپنجاب ءِ سسٹر سٹیٹس گوندنگ نا مخ تفی ءِ کرسا دانا منظوری کن بل ہم گورنر پنجاب چوہدری محمد سرور نا اسمبلی گیلری ٹی ساڑی گری ٹی ایوان اٹی پیش کرینو و اسپیکر کیلی فورنیا اسمبلی و ایلو باسک آک گورنر پنجاب چوہدری محمد سرور ءِ پبی بخیر اٹ پاریر وخت اس کہ داہم پڑو کننگانے کہ کیلی فورنیا حکومت پنجاب اٹی کشت وکشار، جان جوڑی، یونیورسٹی تتون اوار تعلیم نا ایلو بشخ آتے ٹی اصلاحات کن کمک کیک و گورنر پنجاب امریکی ریاست کیلی فورنیا و پنجاب ءِ سسٹر سٹیٹس گوندنگ نا فیصلہ نا ہم ستاءِ کرینے۔ گورنر پنجاب چوہدری محمد سرور دابابت گپ وتران کرسا پارے کہ امریکی ریاست کیلی فورنیا و پنجاب ءِ سسٹر سٹیٹس گوندنگ نا فیصلہ ستاکڑزک، داڑآن ہڑتوم آک اسہ ایلو نا آزموندہ غاتیان پبی فائدہ دوئی کیرہ، وزیراعظم عمران خان نا کماشی ٹی پاکستان سفارتی پڑآہم سرسہبی اٹ مون آ ہِننگ ءِ۔ زرگزرانی بشخ اٹی ننا سرسہبی و امن کن دنیا ٹی پاکستان نا کڑد انا ستا ءِ کننگ انگ ءِ۔ چوہدری محمد سرور پارے کہ امریکی ریاست کیلی فورنیا نا باسک آتون اوار ایلو مخلوق تون مروک آ اوڑدہی تیٹی اوفتے کشمیر و فلسطین اٹ برجا ظلم انا بابت ہم پارینے و اوفتیا زور شاغانے کہ کشمیر نا ویل و فلسطین نا ایسری کن امریکی حکومتی، سیاسی جماعت و تنظیمک ایسری کن تینا کڑد ءِ ادا کیر تانکہ دنیا ٹی پورو امن مننگ کے۔

متعلقہ مضامینمصنف کی طرف سے مزید