ای سی او ملک آک دے ٹک و دیکی نا نیام اٹ جہانی واپاری راہداری نا اسٹ انا ذریعہ ءُ، اسپیکر قومی اسمبلی نا پائیکو کانفرنس آن تران

اسلام آباد۔ 01جون (اے پی پی) اسپیکر قومی اسمبلی اسد قیصر پارینے کہ اقتصادی کمکاری نا تنظیم نا باسک ملک آتے تینا گچین اجتماعی کڑد آن جہانی سیاست اٹ تینا ہند اس ودی کننگ و علاقائی شونداری آ چکار کروئی مریک، ای سی او ملک آک دے ٹک و دیکی نا نیام اٹ جہانی واپاری راہداری نا اسٹ انگا ذریعہ ءُ، سی پیک نا رداٹ پاکستان آن چین اسکان ریلوائی ٹریک نا تفنگ دامچ آ وسط ایشیائی ڈیہہ کن اقتصادی شونداری ٹی کمکار مریک، گوادر و چاہ بہار نا نیام اٹ ریل نیٹ ورک انا جوڑ کننگ و یورپ و ایران و ترکی نا کمک اٹ وسط ایشیااسکان دانا رسینگ ڈیہہ ٹی اہم اقتصادی شونداری ٹی پیش رو ثابت مریک، پاکستان کشمیری الس نا سیاسی، اخلاقی و سفارتی مخ تفی ءِ ہمووخت اسکان برجاتخک ہراتم اسکان کشمیری اقوام متحدہ نا سلامتی کونسل نا قرارداد آتے مون آ تخسا حق خودارادیت نا تینا روا حق ءِ دوئی کپسہ۔ دوشنبے نادے آ داڑے قومی اسمبلی نا مہمانداری ٹی اقتصادی کمکاری نا تنظیم ای سی او نا پارلیمانی اسمبلی نا ارٹ میکو کانفرنس نا بنائی دود آن تران کرسا اوپارے کہ کوویڈ۔ 19نا جہانی دین انا داریسہ و جہانی پابندی تیان پد ہم شرفمند آ مہمان تا دانگیا بننگ داہیت ءِ ظاہر کیک کہ نن پارلیمانی شریداری آ یخین تخنہ۔و داٹک آ امنااُن کہ نن غٹ اواری اٹ ہی تینا ڈیہہہ ءِ شونداری نا بڑزی تسکان دننگ کینہ۔ 8سال مست علاقائی پارلیمانی الائنس نا دسوک آ بج اینو روتہ خلنگ ءِ۔ ای سی او نا برادر ملک آتا دودوربیدگ، مذہب و تاریخ اسٹ ءِ۔ ننے داڑآ گمر ہم ارے۔ ننا واپاری تعلقداری آزموندہ ءِ۔ ہندا سوگو رشتہ غاتا کمک اٹ نن اسہ ایلو تون گنڈوک اُن۔ دافورم نا کمک اٹ ننے دا موقع دوبسنے کہ نن تینا ڈیہہ کن بامسخت و گچین کمک و رابطہ نا فریم ورک اس جوڑ کین۔ اسپیکر پارے کہ داوخت آ دنیا ٹی ترندی اٹ بدلی بننگ ءِ مثلا غیرریاستی عنصر آتا اثرورسوخ ودنگ ءِ، ہنداوڑ مچ آ دنیا ٹی تشدد پسندی ودنگ ءِ۔ ایلو کنڈآ ریاست آتا انفرادی کڑد کم مننگ ءِ و جہانی سیاست اٹ علاقائی کمکاری ودنگ ءِ۔ ہنداخاطرآن ننکن المی ءِ کہ نن ہم تینا موثراجتماعی کڑد آن جہانی سیاست اٹ تینا ہند اس ودی کین و علاقائی شونداری آ چکار کین۔ مستین اٹ ایشیامچ آ دنیا نا کل پیدوار نا 60درسد بشخ ودی کریکہ ولے ولدا دا بشخ کم مرسا ہنا۔ داسہ ولدا ننا ڈیہہ ٹی ترندی اٹ شونداری مننگ ءِ و زوت آن زوت ننا ڈیہہ دُوارہ دنیا نا شون ہلوک ڈیہہ اس جوڑ مریک۔ اسپیکر پارے کہ آخبت خڑک اٹ دنیا اسہ قطبی آن کثیر قطبی جہانی نظم انا کنڈآ ہِننگ والا ءِ۔ ہنداخاطرآن نن داحالیت آتارداٹ تینا اسیجائی حکمت عملی اس تیار کین۔ ننا ملک آتا جغرافیائی دنگ بھاز اہم ءِ۔ ننا جم آبادی 460ملین بندغ آتیان زیات ءِ۔ نیز ننا ملک آتا رقبہ 8ملین مربع کلومیٹرآن زیات ءِ۔ ننا ملک آک روس ءِ خلیج فارس تون و چین ءِ یورپ تون ملفنگ ءُ۔ ای سی او ملک آک دے ٹک و دیکی نا نیام اٹ جہانی واپاری راہداری نا اسٹ انگا ذریعہ ءُ۔ ننے محل وقوع نا دا برتری آن فائدہ ہرفسا علاقائی شونداری آ چکار کروئی مریک۔اوپارے کہ دا بدبختی ءِ کہ بھلو وارخواہی اس مننگ آن پد ہم ننا مخلوق بین، افلاس، ناجوڑی، ناخواندگی نا گواچی ءِ۔ ننا مخلوق ءِ گچین آخبت کن وارخواہی نا کمتی نا مون تروک ءِ۔ ننے سوگو علاقائی کمکاری نا کمک اٹ مچ آ ڈیہہ ءِ عظیم تر کننگ نا ءِ۔ داچرجوئی ٹی نن ای سی او کون آ ادارہ ءِ مون آ دننگ آن بیدس ڈیہہ ٹی تین پہ تینی واپار، رابطہ کاری و اسیجائی بینکاری نا نظام نا جوڑکننگ آ چکار کین۔ گوادر و چاہ بہار نا نیام اٹ ریل نیٹ ورک نا جوڑ کننگ و یورپ و ایران و ترکی نا کمک اٹ وسط ایشیااسکان دانا رسینگ ڈیہہ ٹی اہم اقتصادی شونداری ٹی پیش رو ثابت مریک۔