اسلام آباد۔ 01جون (اے پی پی) صدر مملکت ڈاکٹر عارف علوی اقتصادی کمکار تنظیم (ایکو) نا باسک ملک آتا نیام اٹ کمکاری و رابطہ غاتے مون آ دننگ نا اہمیت آ زور شاغسا پارینے کہ جہانی باندات آتے ٹی فائدہ غاتے اولیت دوئی ءِ وخت اس کہ داوخت آ دنیا ءِ انسانیت و اخلاقی قدر انا حامل لیڈر شپ انا گرج ءِ، مسلمان ملک آک تینا معاشرت و زرگزران ءِ سوگو کرسا جہانی برادری ٹی تینا روا ہندءِ دوئی کننگ کیرہ۔ او سے شنبے نادے آ داڑے اقتصادی کمکارتنظیم نا پارلیمانی اسمبلی نا ارٹ میکو جنرل کانفرنس نا ایسری سیشن آن تران کریکہ۔ صدر مملکت ایکو ملک آتیان کانفرنس اٹی بشخ ہلوک آ مندوبین تا خیرمقدم ءِ کرسا پارے کہ داکانفرنس باسک ملک آتا نیام اٹ سنگتی و اواری اٹ کاریم کننگ نا عزم ءِ ظاہر کیک۔ صدر مملکت تدوک آ60آن 70سال اٹی مسلم امہ ءِ مون تروک بھلا ویل آتے تالان کرسا پارے کہ مسلمان تے دہشت گردی و انتہاپسندی کون آ چیلنج آتیان بھاز نسخان رسینگانے۔ جہانی واکدار تا تین پہ تینی جنگ اتون اوار اوار معاشرتی بے سگی آن ہم ویل ودی مسنے۔ اوپارے کہ دنیا ٹی اسلام نا ہندن ءُ عکس اس پیش کننگانے ہرانا حقیقت تون ہچ ءُ تعلق اس اف وخت اس کہ فلسطین و غیرکانودی بھارتی مقبوضہ کشمیر اٹی آجوئی نا روا تحریک آتیا دہشت گردی نا لیبل ءِ خلنگانے۔ صدر مملکت مستی پارے کہ مسلمانک دنیا ءِ ایلو ویل آتون اوار اوار تینا برخلاف تعصب نا باندات ءِ ہم بایدے ہرفر۔ دامسخت کن دنیا تون مکالمہ و گپ وتران نا گرج ءِ۔ صدر مملکت ڈاکٹر عارف علوی پارے کہ جہانی امور اٹ فائدہ غاتے اولیت تننگک ہرانا سوب آن ہموڑے اخلاقی قدر انا کمتی نظربریک۔ داحالیت آتے ٹی مسلمانک تینا دینی تعلیمات آتے مون آ تخسا انسانیت و اخلاق آ مبنی لیڈرشپ اس فراوان کننگ کیرہ۔ اوپارے کہ ایکو ملک آک تین پہ تینی کمکاری و رابطہ غاتے مون آ دننگ کن کڑد ادا کیر۔ علاقائی واپار و رابطہ کاری نا دابابت بھلو اہمیت اسے وخت اس کہ پاکستان چین اقتصادی راہداری دانا اہم ذریعہ جوڑ مننگ کیک۔ صدر مملکت کورونا غان ودی مروک آ حالیت و داڑتون مون تننگ کن پاکستان نا سرسہب کوشست آتے ہم تالان کرے۔ اواوغانستان نا ویل انا پائیدار ایسری کن نیک است خواہی نا درشانی ءِ کرسا پارے کہ اوغانستان آن پد دانا غٹ آن زیات فائدہ پاکستان ءِ مریک۔ صدر مملکت داوخت آ ایکوپارلیمانی اسمبلی نا ارٹ میکو جنرل کانفرنس نا باضابطہ بناءِ کرے۔ داکان مست اسپیکر قومی اسمبلی اسد قیصر و ایلومندوبینک ہم تران کریر۔
