اسلام آباد۔ 01جون (اے پی پی) وزیر مملکت حوالکاری و شینکاری فرخ حبیب تون چین انا سفیر نونگ رونگ اوڑدہی کرے ہراٹی تین پہ تینی است خواہی نا باندات، ہڑتوم آ کنڈآتا کمکاری تون اوار ایلو باندات آ گپ وتران کننگا۔ اوڑدہی ٹی چین وپاکستان نا نیام اٹ سفارتی تعلقداری نا 70سال پورو مننگ آ ہڑتوم آ شخصیت آک اسہ ایلو ءِ مبارکبادی تسر۔ وزیر مملکت حوالکاری و شینکاری فرخ حبیب پارے کہ پاکستان و چین نا برادرانہ تعلقداری ءِ ہرا مدام مشکل وخت اٹی پاکستان تون تفک۔ شاہراہ قراقرم ننا سوگو دوستانہ تعلقداری نا شاہدی ءِ، پاکستان نا الس نا پاک چین سنگتی نا بارواٹ گچین خیال تخک و داسنگتی ءِ بڑزکو کہول آ برقرار تخانے۔ وزیر مملکت فرخ حبیب کمیونسٹ پارٹی آف چائنہ(سی پی سی) نا قیام نا 100 سال پورو مننگ آ چینی سفیر و چین نا الس ءِ مبارکبادی ترسا پارے کہ بیلٹ اینڈ روڈ انیشی ایٹیو (بی آر آئی) اسہ بھلو گام اسے ہراٹی پاک چین اقتصادی راہداری(سی پیک) فلیگ شپ ڈٹ اسے۔ وزیر مملکت فرخ حبیب کوویڈ۔ 19آن بچنگ کن ویکسین فراوانی و پبی کمکاری آ چینی سفیر نا منت واری ءِ ہرفے۔ چین نا دا رداٹ دمدستی کمک سفت نا قابل ءِ۔ داڑآن بھاز انگا نہادی جان تے بچفنگ اٹ کمک رسینگا۔ عمران خان نا کماشی ٹی کوویڈ۔ 19نا برخلاف سرسہب حکمت عملی نا جہانی ادارہ جان جوڑی ہم ستاءِ کرینے۔ وزیر مملکت فرخ حبیب پارے کہ علامہ اقبال خصوصی اقتصادی زون فیصل آباد اٹی بنداوی انفراسٹرکچر ساڑی ءِ، داڑے چینی زرکاری نا بھلو وارخواہی اس ساڑی ءِ، وزیر مملکت پاکستانی و چینی کمپنی تے اسیجائی ڈٹ آتا گرج آ زور شاغا۔ وزیر مملکت ہڑتوم آ ملک آتا شار تا نیام اٹ کمکاری و راجی رکھ انا پروگرام تا گرج ءِ ہم مون آ تخا۔ وزیر مملکت فرخ حبیب پارے کہ پاکستان داہیت آن بھاز گڑاہیل کرینے کہ چین 700ملین مخلوق ءِ امر سرسہبی اٹ نیزگاری آن کشا۔ وزیر مملکت پاکستان و چینی میڈیا صنعت نا نیام اٹ کمکاری نا گرج آ زور شاغسا پارے کہ پی ٹی وی و سی سی ٹی وی، اے پی پی و شنوانانیام اٹ مہالو آن ایم او یو ساڑی ءِ۔ ہڑتوم آ ملک آتے فلم سازی کن کمکاری ءِ ودفنگ نا گرج ءِ۔
