اسلام آباد۔ 01جون (اے پی پی) چیئرمین سینیٹ صادق سنجرانی پارینے کہ اقوام متحدہ نا قرارداد و کشمیری مخلوق نا است خواہی تا رداٹ کشمیر نا ویل انا ایسری کن مسلمان ملک آک، او آئی سی و جہانی برادری ءِ کڑد ادا کننگ نا گرج ءِ۔ فیفا ورلڈ کپ 2022و آخبت نا دود آتے کن فٹ بال نا مینو فیکچرنگ کن قطر اٹی فارورڈ یونٹ اسے نا جوڑ کننگ پاکستان کن گمر نا سوب ءِ۔ پاکستان برادرانہ تعلقداری تے سوگو سیاسی و زرگزرانی شریداری ٹی بدل کننگ کن سنبرینگوک ءِ۔ داخیال آتا درشانی ءِ او سے شنبے نادے آ شیخ علی عبداللہ علی ثانی الثانی نا کماشی ٹی 11باسکی قطری ڈل اتون پارلیمنٹ ہاؤس اٹی اوڑدہی ٹی کرے۔ اوڑدہی ٹی تین پہ تینی است خواہی نا باندات و علاقائی حالیت آتیا گپ وتران کننگا۔ چیئرمین سینیٹ پارے کہ پاکستان و قطر انا نیام اٹ خڑکی برادرانہ تعلقداری ءِ۔ پاکستان برادرانہ تعلقداری تے سوگو سیاسی و زرگزرانی شریداری ٹی بدل کننگ کن سنبرینگوک ءِ۔ ہڑتوم آ راہشونک واپار و زرکاری نا بشخ اٹی تین پہ تینی تعلقداری تیٹی پیش رفت آ است جمی نا درشانی ءِ کریر۔ چیئرمین سینیٹ پارے کہ کراچی و حماد بندرگاہ تا نیام اٹ براہ راست رابطہ و پاکستان کن قطر انا فوڈ مارکیٹ ءِ ملنگ آن ہڑتوم آ کنڈآتا واپار ءِ پین مون آ دننگ دوئی مسنے، مالی سال 2020ء ٹی ہڑتوم آ کنڈآتا واپار 1.8بلین امریکی ڈالر ئس ہراکہ ستاکڑزک۔ ہڑتوم آ کنڈآتا واپار نا کچ ءِ پین ودفنگ نا خواہندار اُن۔ اوپارے کہ قطر انویسٹمنٹ اتھارٹی نا پاکستان نا چندی بشخ آتے ٹی زرکاری ءِ بخیر اٹ پانہ۔ نن ہر لحاظ اٹ قطر انویسٹمنٹ اتھارٹی ءِ آسراتی فراوان کینہ، پاکستان ڈیہہ ٹی کاروبار کن غٹ آن زیات زرکاردوست و آجوپالیسی تخوک آ ملک ءِ۔ اوپارے کہ پاکستان اٹی کاروبار کن آسانی ودی کننگ نا بات انڈیکس اٹی نمان گچینی بسنے۔ فیفا ورلڈ کپ 2022و آخبت نا دود آتے کن فٹ بال نا مینو فیکچرنگ کن قطر اٹی فارورڈیونٹ نا جوڑ کننگ پاکستان کن گمر نا سوب ءِ۔ چیئرمین سینیٹ پارے کہ کم و ود 1 لکھ 80ہزار پاکستانی قطرانا شونداری ٹی تینا کڑد ءِ ادا کننگ ءُ، ننے خوشی ءِ کہ 1لکھ منظور مروک کوٹہ آن قطر 72ہزار آن زیات پاکستانی تے نوکری تس۔ اوپارے کہ سال اسے آن زیات وخت مسنے کہ مقبوضہ جموں و کشمیر اٹی پورو لاک ڈاؤن ءِ، کوزہ گیر بھارت کم و ود 80 لکھ کشمیری تے دنیا نا غٹ آن بھلا زندان اٹی تخانے، بی جے پی نا کوزہ گیری ٹی ہندوتوا سوچ انا پیروکار ایلو مذہب، اقلیت و خاص کر مسلمان تا سیاسی، زرگزرانی و راجی استحصال ءِ کننگ اٹ لگوک ءِ۔ اوپارے کہ اقوام متحدہ نا قرارداد و کشمیری مخلوق نا است خواہی تا رداٹ کشمیر نا ویل انا ایسری کن مسلمان ملک آک، او آئی سی و جہانی برادری ءِ کڑد ادا کننگ نا گرج ءِ۔ قطرانا ڈل مہمان تا کتاب اٹ تینا تاثرآتے ہم نوشتہ کرے۔ ڈپٹی چیئرمین سینیٹ مرزااحمد آفریدی ڈل انا شرف اٹی ظہرانہ اس ہم تس۔
