اسلام آباد۔ 01جون (اے پی پی) وزیر داخلہ شیخ رشید احمد پارینے کہ گڑاس مخلوق بے سوب ادارہ غاتیا دوبہ خلنگ ءُ، اوفتے اندازہ اف کہ پاکستان نا تشخص ءِ جہانی کہول آ داڑآن انت نسخان رسینگک، اسد طور آ جلہو کروک آ دوبہ دار آتا ہلنگ آن اوفتا باہ بند مریک، پاکستانی تے سعودی عرب و کویت اٹی روزگار نا بھاز وارخواہی ملک۔ عمران خان نا حکومت کویت کن ویزہ ءِ بحال کرفے، پی ڈی ایم چٹانے۔ سے شنبے نادے آ داڑے وزارت داخلہ ٹی پریس کانفرنس آن تران کرسا وزیر داخلہ پارے کہ وزیراعظم نا پارت آ اسہ دے ئی دورہ غا کویت آ ہناٹ۔ کویت کن میڈیکل، تعمیرات تون اوار چندی بشخ آتے ٹی وارخواہی و فیملی ویزہ نا آسراتی بحال مسنے۔ وزیراعظم عمران خان نا حکومت ءِ دانا کریڈٹ کاہک۔ دابھاز بھلو ویل اس ئس ہرادے اونا حکومت ایسر کرے۔ سعودی عرب اٹی 30لکھ ملازمت نا وارخواہی ارے ہرافتیان 30 درسد پاکستانی تے ملک۔ درملکی ترسیلات زر انا پاکستانی زرگزران اٹ بھلو کڑد اسے۔ پاکستانی زرگزران ءِ داڑآن سوگوی دوئی مریک۔ پاکستان آن ڈاکٹر و تعمیرات نا بشخ اتون وابستہ افرادی قوت کویت اٹ ملازمت آتے کن کاہک۔ 425ڈاکٹر ہنداہفتہ غا کارہ۔ کویت اٹی بند 52پاکستانی آن 6پدی بننگ خوارہ۔ اوپارے کہ سائبر کرائمز نا 94لکھ کیس ئسر، کنا دور اٹی 36ہزار رپورٹس ءُ ہرافتیان 5 ہزار 355انکوائری مسنے ہرانا نتیجہ ٹی 399مقدمہ درج کننگانے۔ وزیر داخلہ پارے کہ اومیت ءِ کہ اسد طور نا کیس اٹ حقیقت نا خڑک سرمرینہ۔ نادرا، ایف آئی اے و پولیس اواری اٹ داواقعہ نا جاست وپاست ءِ کننگ ءُ۔ فنگر پرنٹ آتیان ہم کمک ہلنگ انگ ءِ۔ اگہ داڑآن ہم دوبہ دار آتا پیدواری متو تو اشتہار ایتنہ۔ داہم سماتمانے کہ جلہو کروک آ مہالو ہم داماڑی آ بسوسس۔ اسہ بندغ نا شناخت نا خڑک ءِ۔ داواقعہ نا دوبہ دارآتے ہلنگ المی ءِ انتئے کہ گڑاس مخلوق درملکی آقا تے خوش کننگ کن حساس ادارہ غاتے شست کننگ ءُ۔ دوبہ دار آتا ہلنگ آن اوفتا باہ بند مریک ہرا تینا کمپنی نا پنی مننگ کن بے سوب ادارہ غاتیا دوبہ خلنگ ءُ۔ اوفتے اندازہ اف کہ داوڑنا دوبہ خلنگ آن جہانی کہول آ پاکستان نا تشخص ءِ اخس نسخان رسینگک۔ وزیر داخلہ پارے کہ سائبر ونگ ءِ پوسکن آ ازباب آتیان شپ کننگ اُن، اوفتے پوسکن ءُ یونیفارم اس ایتنہ، اسٹاف نا کمتی ءِ ہم مر کننگک۔ نادرا ءِ ہم گچین کننگ انگ ءِ۔ اوپارے کہ ادارہ غاتیا مذموم سوچ و خاص مسخت کن بے سوب دوبہ خلنگ قابل مذمت ءِ۔ ای حامد میر نا پروگرام نءِ بندکتوٹ۔ وزیر داخلہ پارے کہ حکومت کن اسد طور جلہو نا دوبہ دار آتا ہلنگ بھاز اہمیت تخک۔ صحافی تیا جلہو آتا واقعہ غاتیان حکومت آ سوج انا نشان بش مریک و انسانی حق انا ویل ہم جوڑ مریک۔ گڑاس مخلوق ہرافتا مسخت پین مریک او داوڑنا واقعہ غاتیان فائدہ ہرفرہ و ادارہ غاتیا دوبہ خلیرہ۔ داوڑنا واقعہ غاتے ٹی اوار بندغ آتے سخت سزا بایدے ملے۔ دابابت بایدے پالیسی اس جوڑ مرے۔ صحافی تے اسلام آباد اٹی آلاٹ کننگ نا بابت سوج آ وزیر داخلہ پارے کہ ہراصحافی تے مہالو پلاٹ رسینگتنے اوفتے پلاٹ تننگک و صحافی تنظیم تا کمک اٹ دا کاریم ءِ کننگک۔ نن دا بابت تینٹ ہچ ءُ فیصلہ اس کپنہ۔ صحافتی تنظیمک ہرافیصلہ ءِ کیرہ اونا اشتہار اس اتینہ۔ اسہ پین سوج اسے نا ورندی ٹی اوپارے کہ پی ڈی ایم چٹانے۔ ای پاریسٹ کہ نون آن شین پیش تمک، ہنداوڑ پیش تمک۔ پی ڈی ایم اٹی داسہ بیرہ فضل الرحمان و نون لیگ رہینگانو۔ اِراپارٹی پی ڈی ایم اٹی ءُ، اِرٹ پیشن ءُ وداسہ دا بیرہ میڈیا نا حداسکان ءُ۔ اسہ پین سوج اسے نا ورندی ٹی اوپارے کہ کویت کن ویزہ بحال مننگ بھاز اہم ءِ۔ دابھازبھلو ویل اس ئس ہرا دے عمران خان نا حکومت ایسر کرے۔
