دہشت گرد آتا برخلاف جنگ برجاسلک، بلوچستان نا امن و شونداری ءِ لتاڑنگ کن ہلنگ پننگک، وزیراعظم عمران خان نا بلوچستان اٹی دہشت گرد جلہو آتا مذمت

اسلام آباد۔ 01جون (اے پی پی) وزیراعظم عمران خان بلوچستان اٹی دہشت گرد جلہو آتا ترندی اٹ مذمت ءِ کرسا پارینے کہ دہشت گردآتا برخلاف جنگ برجاسلک، بلوچستان نا امن و شونداری ءِ لتاڑنگ کن ہلنگ پننگک۔ سے شنبے نادے آ تینا ٹویٹ اٹی وزیراعظم بلوچستان اٹی دہشت گرد آتا جلہو نا ترندی اٹ مذمت ءِ کرے ہراٹی 4ورنا شہید و 8 ٹھپی مسر۔ وزیراعظم پارے کہ او شہید آتا خاہوت آتون ہڑزخواہی کیک و اونا دعاک و ہمدردیک اوفتے تون تفوک ءُ۔ وزیراعظم پارے کہ دہشت گرد آتا برخلاف ننا جنگ برجاسلک و اوفتے بلوچستان اٹی امن و شونداری ءِ لتاڑنگ نا موکل تفنہ۔ داکان مست پاک فوج انا شعبہ تعلقات عامہ نا کنڈآن جاری بیان نا رداٹ کوئٹہ و تربت اٹی ایف سی نا دستہ غاتیا جلہو کننگا۔ دہشت گرد آک پیراسماعیل زیارت اٹ ایف سی نا پوسٹ ءِ شست کریر، ایف سی و دہشت گرد آتا نیام اٹ اسہ ایلو آ سم کاری مس ہراٹی 4 آن 5 دہشت گرد زوال وخت اس کہ 7، 8ٹھپی مسر وخت ا س کہ ایف سی نا 4ورناشہیدی نا جام ءِ نوش کریر و 6ٹھپی مسر۔ ایلو واقعہ ٹی دہشت گرد آک تربت اٹی ایف سی نا گاڈی ءِ دھماکہ خیز مواد اٹ شست کریر ہراٹی ایف سی نا 2ورنا ٹھپی مسر۔