اسلام آباد۔ 01جون (اے پی پی) وزیرخارجہ مخدوم شاہ محمود قریشی پارینے کہ ننا سرسہب خارجہ پالیسی نا سوب آن، دنیا پاکستان ءِ ویل آتا ایسر کننگ نا بشخ تکک۔ ہیومن رائٹس کونسل اٹ فلسطینی تیا کروک آ ظلم و انسانی حق انا بھلا خلاف ورزی تا جاست وپاست کن آجوکمیشن نا قرارداد نا منظوری اہم ءُ سرسہبی اسے۔ سے شنبے نادے آ تینا اسہ بیان اسے ٹی وزیر خارجہ پارے کہ تدوک آ چار دہائی اٹ اسہ وزیر خارجہ اس ہم داکان مست عراق نا دورہ غا اِنتنے۔ عراق او آئی سی نا اہم ءُ ملک اسے و دے ٹک نیامی ٹی امن نا بابت عراق نا کڑد بھاز اہمیت تخک۔ وزیر خارجہ پارے کہ فلسطین نا بابت ”سیزفائر“ نا حالت اٹ بنائی سرسہبی ملا۔ او آئی سی نا کنڈآن پاکستان اقوام متحدہ ہیومن رائٹس کونسل اٹ قرارداد پیش کرے۔ اوپارے کہ عراقی ہم منصب ءِ کشمیر نا ویل انا بابت ہم معلومدار کریٹ۔ عراقی ہم منصب ءِ پارین نن ڈیہہ ٹی امن اٹ رہینگ انگ خوانہ، وزیر خارجہ پارے کہ یواے ای تون پاکستان نا جوان ءُ تعلقداری اسے۔ آخبت اٹ یواے ای تون پین سوگو تعلقداری خوانہ۔ وزیراعظم عمران خان صاحب نا ہم یواے ای نا ولی عہد تون ہیت وگپ مس۔ مخدوم شاہ محمود قریشی پارے کہ پی ایس ایل میچ آتے ٹی ہراتم زرس دقت پیش بس تو کنا یو اے ای نا وزیر خارجہ تون گپ وتران اٹی آسانی ودی مس۔ اوغانستان نا ویل آ اپوزیشن جماعت آتے درو معلومدار کریٹ۔ اوغانستان نا ویل آ اپوزیشن نا سلاہ ءِ ہم ہلکن۔ شاہ محمود قریشی پارے کہ ہندوستان آ غٹ آن زیات دباؤ، اونا تہہ نا بگڑینگوک آ حالیت آتا ءِ، حساب وکتاب نارداٹ انڈیا ٹی 230ملین آبادی نیزگاری نا لکیر آن شیف رہینگ انگ ءُ۔ ہندوستان نا زرگزران غلط پالیسی تا سوب آن 7.3درسد اسکان مچ مسنے۔ بیرہ اپریل نا تُو اٹی 73 لکھ مخلوق ہندوستان اٹ بے روزگار مسنو۔ بھارت نا است خواپ ہم ولدا ہم اودے مقبوضہ کشمیر نا خصوصی حیثیت ءِ بحال کروئی تمک۔ شاہ محمود قریشی پارے کہ مہالو اوغانستان اٹی انتس کہ مسکہ اونا دوبہ پاکستان آ خلنگاکہ، اینو ننا سرسہب خارجہ پالیسی نا سوب آن، دنیا پاکستان ءِ ویل آتا بشخ آخا بلکن ویل آتا ایسر کننگ نا بشخ تکک۔
