اسلام آباد۔ 31مئی (اے پی پی) بنجائی وزیر حوالکاری و شینکاری چوہدری فواد حسین پارینے کہ ٹیکنالوجی نا کاریم اٹ اتنگ گچین کاری تیٹی شفافیت ءِ پک کننگ اٹ اہم ءُ کڑد اس ادا کننگ کیک، سرسہب ورناپروگرام نا رداٹ 45سال آن کم وئی وکیل آتے 10لکھ روپئی اسکان نا وام تننگ آ سجفنگ انگ ءِ، بارایسوسی ایشن نا اہم کانودی باندات آ قائدانہ کڑد المی ءِ۔ داخیال آتا درشانی ءِ او دوشنبے نادے آ داڑے ہائی کورٹ بارایسوسی ایشن اسلام آباد و ڈسٹرکٹ بارایسوسی ایشن اسلام آباد نا ڈل اتون گپ وتران کرساکرے۔ اوڑدہی ٹی بارایسوسی ایشن تا باسک آتے الیکٹرانک وونٹنگ مشین نا کاریم اٹ اتنگ نا بارواٹ آگاہی فراوان کننگا۔ داوخت آ بنجائی وزیر حوالکاری پارے کہ پنجاب بار کونسل، راولپنڈی بار وملتان بار تینا گچین کاری الیکٹرانک وونٹنگ مشین نا کمک اٹ کرفنگ نا خواست کرینو۔ اوپارے کہ وزیراعظم وکیل آتا ویل آتا ایسری نا زمواری ءِ تسنے، وکیل آتا ویل آتا ایسری کن ہروڑنا کمک فراوان کننگ کن تیار اُن۔، چوہدری فواد حسین پارے کہ وکلاء چیمبرز نا تفنگ کن سی ڈی اے ءِ اولیتی بنداو تیا کاریم کننگ نا پارت کننگانے۔ اوپارے کہ سرسہب ورناپروگرام نا رداٹ 45سال آن کم وئی وکیل آتے 10لکھ روپئی اسکان نا وام تننگ آ سجفنگ انگ ءِ۔ اسٹیٹ بینک آف پاکستان تون ہیت کرسا وکیل آتے کن خصوصی پیکج اس اتنگک۔ ورناوکلاء و زالبول وکیل آک داپیکج آن فائدہ ہرفرہ۔ وکیل راہشونک اسلام آباد ماسٹرپلان اٹ جوڈیشل کمپلیکس نا ایشو ءِ ایسر کننگ و پی سی ون جوڑ کننگ آ بنجائی وزیر حوالکاری نا منت واری ءِ ہرفیر۔ اسلام آباد ہائی کورٹ بار ایسوسی ایشن اسلام آباد نا صدر راجہ زاہد داوخت آ پارے کہ آئین و کانود نا رداٹ اسہ بندغ اس یا ادارہ اس احتساب آن ایڑتر اف، جج آتون اوار ہربندغ کانودءِ جوابدہ ءِ۔ اوپارے کہ اسلام آباد باراسہ رول ماڈل اسے، بار و بینچ انا مدام جوان ءُ تعلق اس مسنے۔ صدر ڈسٹرکٹ بار ایسوسی ایشن اسلام آباد فرید حسین کیف پارے کہ وکیل آک مدام زمواری نا درشانی ءِ کرینو، ملک انا گچینی کن ہم کوپہ سلرہ۔ اوڑدہی کروک آتے ٹی ہائی کورٹ بار ایسوسی ایشن اسلام آباد نا صدر راجہ زاہد، نائب صدر فضل الٰہی، جوائنٹ سیکرٹری اخترمحمود، فائنانس سیکرٹری عرفان اللہ خان بانگی خیل، ایگزیکٹو باسک فاخرہ سلطان، رانا علی اکبر، راناتنویر، سرفراز، آمنہ علی وخت اس کہ ڈسٹرکٹ بارایسوسی ایشن اسلام آباد نا صدر فرید حسین کیف، نائب صدر فرزانہ فیصل، چیئرمین ایگزیکٹو کمیٹی راجہ محمد سعید، ممبران ایگزیکٹیو کمیٹی سید صلاح الدین شاہ، سردار ناصر، شمسہ کیانی، چوہدری فیصل محمود، وصیع اللہ اوار ئسر۔
