اسلام آباد۔ 31مئی (اے پی پی) اسپیکر قومی اسمبلی اسد قیصر تون دوشنبے نادے آ پیکو کانفرنس اٹی بشخ ہلنگ کن بروک آ اوغان ولوسی جرگہ نا اسپیکر میر رحمان رحمانی نا اوغان پارلیمانی ڈل اتون اوار اوڑدہی کرے۔ ہراٹی ہڑتوم آ کنڈآتا تعلقداری، تین پہ تینی واپار و ڈیہہ نا زرگزرانی حالیت آتون اوار پی اے ای سی او کانفرنس آ گپ وتران کننگا۔ اسپیکر اسد قیصر پارے کہ پاکستان و اوغانستان نا نیام اٹ سوگو تعلقداری علاقائی امن و سوگوی کن المی ءِ۔ ہڑتوم آ ملک آتا نیام اٹ پارلیمانی رابطہ غاتے ٹی ودکی آن ہڑتوم آ کنڈآتا تعلقداری سوگو مریک، پاکستان اسہ پرامن و سوگو اوغانستان اس ہُننگ نا خواہندار ءِ۔ اوغانستان نا پارلیمانی ڈل انا ساڑی آ دورہ ہڑتوم آ کنڈآتا پارلیمانی تعلقداری تے مون آ دننگ دوئی مریک و ہڑتوم آ کنڈآتا کمکاری ٹی ودکی کن اہم مزل نا نشان مریک۔ پی اے ای سی او کانفرنس نا اڈتننگ آن ای سی او ملک آتے ٹی واپاری و زرگزرانی کمکاری ءِ مون آ دننگ دوئی مریک۔ پیکوکانفرنس نا اڈتننگ ڈیہہ نا شونداری و شونہالی ٹی ودکی کن اہم مزل نا نشان مریک۔ اوغان اسپیکر پارے کہ اوغانستان پاکستان تون تینا برادرانہ تعلقداری تے قدر انا نظر اٹ ہرک و اوفتے پین سوگو کننگ نا خواہندار ءِ، ڈیہہ ٹی امن نا قیام کن پاکستان نا کڑد ستاکڑزک، ہڑتوم آ ملک آک تینا جغرافیائی اہمیت ءِ کاریم اٹ اتسا زرگزرانی سوگوی دوئی کننگ کیرہ۔ پی اے ای سی او کانفرنس نا اڈتننگ ای سی او ملک آتا نیام اٹ تعلقداری ٹی ودکی و ڈیہہ نا شونداری و شونہالی کن نیک بختی اس جوڑمریک۔
