اسلام آباد۔ 31مئی (اے پی پی) اسپیکر قومی اسمبلی اسد قیصر تون دوشنبے نادے آ اقتصادی کمکار تنظیم نا ارٹ میکو پارلیمانی کانفرنس اٹی بشخ ہلنگ کن پاکستان نا دورہ غا بروک آ ازبکستان نا اسپیکر اسمائلوو اوڑدہی کرے ہراٹی اوڑدہی ٹی ہڑتوم آ کنڈآتا تعلقداری و ای سی او ملک آتا مروک آ پارلیمانی کانفرنس آ گپ وتران کننگا۔ اسپیکر قومی اسمبلی اسد قیصر ازبکستان نا اسپیکر نا کانفرنس اٹی بشخ ہلنگ کن پاکستان آ بننگ آ اونا منت واری ءِ ہرفے و پارے کہ پاکستان و ازبکستان نانیام اٹ برادرانہ و دوستانہ تعلقداری تے بھاز اہمیت ایتک۔ ہڑتوم آ اسپیکر آک ای سی او پارلیمانی تنظیم ءِ پین فعال کننگ آ امنا کریر۔ اسپیکر اسد قیصرپارے کہ ای سی او پارلیمانی تنظیم باسک ملک آتے ٹی رابطہ غاتے مون آ دننگ و شونداری نا ہدف آتا دوئی کننگ اٹ اہم ءُ پیش رفت اس جوڑ مریک۔ ازبکستان نا اسپیکر کانفرنس اٹی بشخ ہلنگ کن سلہ خلنگ آ اسپیکر قومی اسمبلی نا منت واری ءِ ہرفے و پارے کہ ای سی او پارلیمانی کمکار تنظیم باسک ملک آتے ٹی السی، اقتصادی و راجی بشخ آتے ٹی کمکاری ءِ مون آ دننگ اٹ اہم ءُ کڑد اس اداکیک۔ کشمیری تا حق انا بھلا خلاف ورزی کشمیری الس ءِ آجوئی نا روا حق انا خواست آن توننگ کپک۔
