اسلام آباد۔ 31 مئی (اے پی پی) وزیراعظم عمران خان پارینے کہ حکومت مریس مدتی ڈٹ و ڈٹ بندی نا کنڈآ ہِننگ ءِ، 10ڈیم تا تفننگ داچرجوئی نا کڑی اسے، کشت وکشار، لائیو اسٹاک اٹ جدت اتنگ اُن، اِراپوسکن ءُ ماحول دوست شار جوڑ کننگ انگ ءِ، جان جوڑی کارڈ دراصل جان جوڑی نا اسہ پورو ءُ نظام اسے، اسہ قوم اس جوڑ کننگ کن اسہ وڑنصاب درستی راستی کرفنگ اُن۔ زرگزرانی سوگوی آن پد داسہ پیسہ کن کسرپٹنگ ننا ہدف ءِ۔ اودوشنبے نادے آ واپڈا نا کنڈآن پاکستان نا اولیکو گرین یورو(انڈس بانڈ) انا باضابطہ جاری کننگ نا دود اٹی مہمان خاص نا حیثیت اٹ تران کریکہ۔ واپڈانا کنڈآن گرین یورو(انڈس بانڈ) ءِ جاری 500ملین ڈالر نا دوئی کننگ کن کننگانے۔ گرین یورو (انڈس بانڈ) دیامربھاشاو مہمند ڈیم انا فنانسنگ کن جاری کننگانے۔ گرین یورو(انڈس بانڈ) ریاستی ضمانت نا جاگہ غا واپڈا نا سوگو مالی پوزیشن نا بنداو آ جاری کننگانے۔ گرین یورو(انڈس بانڈ) اٹ دنیا نا بھلا بھلا مالیاتی ادارہ غاک بھاز است خواہی نا درشانی ءِ کریر۔ گرین یورو(انڈس بانڈ) اٹی جہانی مالیاتی ادارہ غاتا بھاز است خواہی ہلنگ پاکستان و واپڈا نا سوگو مالی پوزیشن آ پت انا درشانی ءِ۔ ورلڈ فنانس مارکیٹ اٹ گرین یورو(انڈس بانڈ) انا بھلا پذیرائی آن پاکستان اٹ بھلا ڈٹ آتا فنانسنگ کن پوسکن ءُ کسر ملنگانے۔ وزیراعظم بانڈ انا جاری کننگ آ چیئرمین واپڈا و اونا ٹیم ءِ مبارکبادی ترساپارے کہ حکومتی ادارہ جوان ءُ ریٹ اسے آ دا وام تے دوئی کرینے۔ او ہراترندی اٹ ڈیم تیا کاریم کرے اوڑآہم اودے خراج تحسین پیش کیوہ، بھاشا و مہمند ڈیم انا ہراتم بناءِ کرے تو اِراسال اٹی داخہ پیش رفت نا گمان الوکہ دانا بنداوی سوب عملدرآمد نا کمتی ئس۔ اوپارے کہ قومک مریس مدتی ڈٹ بندی آن عظیم جوڑمریرہ۔ ننا داڑے ہر بشخ اٹی دانا کمتی ئس، 1960نا دہائی ٹی پاکستانی تے اسہ اومیت و پت اس ئس، کرار کرار آ داٹی تنزلی برساکرے، ہمووخت آ ہراتم نن بھارت تون کرکٹ کرسا پدی پاکستان آ بسنہ تو ہندن لگاکہ کہ نیزگار ءُ ملک اسے آن شون ہلوک ءُ ملک اسے ٹی بسونن۔ 1985آن پد داٹی تنزلی بناکرے، ہندوستان ننے آن مون آ پیش تما، بنگلہ دیش ہرادے نوکاپ و ایلو سوب آتیا اسہ بھاریم اس گوندسا کننگا اوہم ننے آن مون آ ہنا، نن بجلی گونڈ مدبنداو تیا جوڑ کرین، اوٹی کیہی وار بدنیتی نا عنصر نمان ئس، نن برصغیر اٹ غٹ آن کبین ءُ بجلی ودی کننگ اُن۔ وزیراعظم پارے کہ بروک آ دہ سال اٹی 10پوسکن ءُ ڈیم جوڑ کننگ اُن ہراڑآن 10 ہزار میگاواٹ بجلی ودی مریک، 12 ملین مکعب ایکڑ فٹ ودکی دیر دوئی مریک، اسہ لکھ ایکڑ ڈغار سیراب مریک، آبادی ٹی ودکی اتون زیات پیدوار ہم وخت انا گرج ءِ، داگام گیج آن ملکی سلامتی و فوڈ سیکورٹی ہم دوئی مریک، داڑآن ماحول دوست بجلی ودی مریک۔ وزیراعظم پارے کہ پاکستان ہمودہ ملک آتے ٹی اوار ءِ ہراڑے جہانی حدت غٹ آن زیات ءِ، پاکستان ماحولیاتی اعتبار اٹ زہمی ءِ ننے اینو آن تینا چین تا بارواٹ سجفوئی ءِ کہ ہندن ءُ گام گیج کین کہ اوفتا زند گچین مرے، اوفتے کن جوان ءُ پاکستان اس ہلن کان۔ ماحولیاتی بدلی تیان ننا گلیشیئر ترندی اٹ دیر مننگ ءِ، گلیشیئر نا دیرمننگ آندیر اننا کمتی نا مون تروک مننگ کیک۔ اوپارے کہ پاکستان اٹی پن بجلی ودی کننگ نا بھلو گنجائش اسے۔ نن دہ ارب درخت خلنگ نا ہدف نا بناءِ کرینن۔ خیبرپختونخوا ٹی اسہ ارب درخت خلکن۔ 2018ء ٹی بناکروک 10 ارب درخت آتا ڈٹ آن ہم اسہ ارب درخت خلکوننن دا ڈٹ 2023ء ٹی پورو مریک۔ داڑآن ماحولیات آ مثبت اثر تمک۔ داڑآن روزگار و سیل و سوات نا وارخواہی ودی مریک۔ شار تے ٹی ہم درخت خلینہ۔ شار تے ٹی داڑآن کچٹی ٹی کمتی بریک، اسہ وخت اس ئس ہراتم لاہور ءِ باغ تا شار پاریرہ، ہموڑے کچٹی خطرناک حداسکان سرمسنے۔ وزیراعظم پارے کہ واپڈا نا دا گام آن ہراڑے اڑزآن و ماحول دوست بجلی نادوئی مریک ہموڑے قومی پارک جوڑ کننگ آن وائلڈ لائیو ءِ رکھ ملک، مین گرووز اٹی ودکی کننگ اُن۔ اوپارے کہ پاکستان اٹی رائج نصاب و نظام تعلیم آن قوم مسہ درجہ غاتے ٹی بشخ ءِ نن اسہ وڑ نصاب اتسا داپرخ ءِ چٹفنگ اُن، داسوب آن بنداو پرستی مون آہنا، وزیرتعلیم اسہ وڑنصاب کن زبردست کاریم کرے و غٹ کڑدہ غاتا سلابت اٹ دادے عملی دروشم اس تس، دینی مدرسہ غاتے اولیکو وار قومی دنگ اٹ اتنگ اُن۔ اوپارے کہ پاکستان اٹی ڈاکٹر، نرسنگ و آبادی ٹی پرخ بھاز زیات ءِ، داڑکن ہیلتھ کارڈ درستی راستی کرفینن ہراڑآن کے پی کے و پنجاب نا پورو آبادی فائدہ ہرفنگ والا ءِ داڑآن جان جوڑی نا بشخ اٹی انقلاب اس برپامریک، نجی بشخ داسہ دابشخ اٹی پبی بشخ ہلیک۔ نجی ہسپتال خلق آتے ٹی ہم جوڑ مریک۔ حکومت تون داخہ وسیلہ اف کہ او ہرجاگہ غا ہسپتال جوڑ کننگ کے۔ اوپارے کہ نن نیوٹریشن نا پروگرام اس اتنگ اُن، ننا زرگزران سوگو مسنے داسہ نن دولت یکجا کننگ نا کنڈآ ہِننگ اُن، ولدا گڑا وام تا بھاریم آن پیش تمنہ ہراتم دولت مریک۔ تعمیراتی بشخ ءِ مون آ دننگانے، اِراپوسکن ءُ شار جوڑ کننگ اُن، صنعت آتا مون آ دننگ کن 1960ء نا دہائی آن پد غٹ آن زیات آسراتی تسونن۔ کشت وکشار زرگزران اٹ تمبہ نا حیثیت تخک۔ داسال چندی فصل آتے ٹی بمپرپیدوار مسنے، داٹی پین ودکی کن سیڈ ڈویلپمنٹ نا کنڈآہِننگ اُن تانکہ فی ایکڑ پیدوار ءِ ودفنگ کین۔ لائیواسٹاک نا کنڈآ چکار کرینن۔
