اسلام آباد۔ 31 مئی (اے پی پی) وزیراعظم نا پروٹیکٹڈ ایریہ غاتا پروگرام نا رداٹ گلگت بلتستان اٹی اِرابڑزکو انگا نیشنل پارک آتا شونداری نا ڈٹ آن علاقہ ٹی ایکو سسٹم نا بحالی، ایڈونچر آ منبی سیل و سوات و ہندی مخلوق کن روزگار نا پائیدار وارخواہی تے مون آ دننگک۔ ہمالیہ نیشنل پارک و نانگا پربت نیشنل پارک کم و ود چار ہزار مربع کلومیٹر نا علاقہ غا تالان ءُ ہرا گلگت بلتستان نا جم رقبہ نا پنچ درسد آ تالان ءُ۔ وزیراعظم عمران خان قدرتی چاگڑد نا بحالی و رکھ انا کوشست آتا بشخ انا وڑاٹ بھاز بڑزی آ واقع دااِرا نیشنل پارک آتا ساڑی ہی ٹی بناءِ کریسس۔ داکان بیدس گلگت بلتستان اٹی نگہبان نا پن اٹ اولیکو نیشنل پارکس سروس نا ہم منظوری ءِ تننگانے، داڑآن قدرتی چاگڑدنا رکھ اتون اوار اوار ورناتے گرین روزگار و ایکو ٹورزم ءِ مون آ دننگ دوئی مریک۔ وزارت موسمیاتی بدلی نا کمامدارآتارداٹ ہڑتوم آ نیشنل پارک آک قدرتی چاگڑد و حیاتیاتی تنوع نا بابت یکتاءُ حیثیت اس تخرہ ہراڑے نیال و ساہدار تا گڑاس نایاب وڑارے۔ دافتے ٹی ہمالیائی ریچھ، برفانی چیتا، مارخور، آئبیکس، لداخ کھڑیال و نیل ڈگی نمان ءُ۔ یات سلے کہ 2018اسکان پاکستان اٹی نیشنل پارک آتا کچ 30ئس ولے وزیراعظم عمران خان نا پروٹیکٹڈ ایریہ غاتا پروگرام نا رداٹ ملک اٹی نیشنل پارک آتا کچ پنجا درسد ودکی اتون 45 اسکان سرمسنو۔ وزارت موسمیاتی بدلی نا رداٹ غٹ نیشنل پارک آتے کن کمیونٹی آ مبنی مینجمنٹ نا نظام اس اتنگ نا ڈٹ اس جوڑ کننگانے۔ دامسخت کن گلگت بلتستان اٹی نگہبان نا پن اٹ اولیکو نیشنل پارکس سروس نا ہم منظوری ءِ تننگانے۔ داڑآن صوبہ نا پنچ ہزار ورناتے گرین روزگار ہم ملک۔ دانگہبان تے باقاعدہ تربیت تننگک ہراعلاقہ ٹی حیاتیاتی تنوع و قدرتی چاگڑدنا رکھ اتون اوار اوار ایکوٹورزم نا مون آ دننگ کن ہم داپارک آتیٹی زمواری سرایترہ۔ گلگت بلتستان اٹی اِرانیشنل پارک آتا جوڑ کننگ نا پڑو آن پد علاقہ ٹی اسہ یکتا و بڑزو بالا نیچر کوریڈور اس ہم جوڑ مسنے ہرا علاقائی جنگلی حیات نا رکھ اکن اسہ رکھوک و منظم کوریڈور اس دوبسنے۔ ہنداوڑ داعلاقہ نا نایاب لداخ کھڑیال نا رکھ و اونا قدرتی چاگڑد اٹ افزائش نسل نا ڈٹ اس ہم ٹہیفنگانے تانکہ بقانا خطرہ غان دوچار دانسل انا کچ ءِ ودفنگ مرے۔
