اسلام آباد۔ 31 مئی (اے پی پی) چیئرمین سینیٹ محمد صادق سنجرانی پارینے کہ پاکستان ازبکستان تون تینا برادرانہ تعلقداری تے اہمیت ایتک، پاکستان و ازبکستان نا نیام اٹ تاریخی، مذہبی و دودوربیدگی تعلقداری ءِ، پاکستان ازبکستان تون خڑکی برادرانہ تعلقداری تے بھاز قدر انا نظر اٹ ہرک، پاکستان، اوغانستان و ازبکستان نا نیام اٹ ریلوائی ڈٹ زرگزرانی شونہالی نا ضامن جوڑ مریک۔ داخیال آتا درشانی ءِ او ازبکستان نا کانود ساز اسمبلی اوئلا مجلس نا اسپیکر نوردین جون اسماعیلوتون گپ وتران کرسا کرے ہرادوشنبے نادے آ داڑے اوڑتون اوڑدہی کرے۔ چیئرمین سینیٹ محمد صادق سنجرانی پارے کہ پاکستان ازبکستان تون تینا برادرانہ تعلقداری تے اہمیت ایتک۔ پاکستان و ازبکستان نا نیام اٹ تاریخی، مذہبی و دودوربیدگی تعلقداری ءِ۔ زرگزرانی کمکار تنظیم نا پارلیمانی اسمبلی نا ارٹ میکو جنرل کانفرنس نا دیوان اٹی بشخ ہلنگ کن ازبک ڈل ءِ بخیر اٹ پاوہ۔ اوپارے کہ پاکستان ازبکستان تون خڑکی برادرانہ تعلقداری تے بھاز قدر انا نظراٹ ہرک۔ ازبکستان نیامی ایشیائی ملک آتا اہم ءُ ملک اسے۔ پاکستان و ازبکستان نا نیام اٹ زرگزران، دفاع، دودوربیدگ، تعلیم، واپار و سیل و سوات نا بشخ اٹی کمکاری ءِ پین مون آ دننگ نا سخت گرج ءِ۔ صادق سنجرانی پارے کہ زرگزرانی کمکاری نا مون آ دننگ آن ہڑتوم آ ملک آتا مخلوق و زرکارآتے خڑک بننگ نا موقع ملک۔ تین پہ تینی تعلقداری، واپار، زرکاری و سیل وسوات نا مون آ دننگ کن ہڑتوم آ ملک آتا نیام اٹ پارلیمانی تعلقداری تا مون آ دننگ بھاز المی ءِ۔ پاکستان، اوغانستان و ازبکستان نا نیام اٹ ریلوائی ڈٹ زرگزرانی شونہالی نا ضامن مریک۔ محمد صادق سنجرانی پارے کہ ڈٹ آن سنٹرل ایشیاء نا ٹرانسپورٹ نظام ءِ پاکستان نا بندرگاہ، گوادر، کراچی و قاسم پورٹ تون گنڈنگ اٹ کمک رسینگک۔ ہڑتوم آ ملک آتے کورونا دین انا مون تروک ءِ و گچین حکمت عملی و رکھی گام گیج آتیان دا دین انا زوت مون ءِ توننگک۔ پاکستان و ازبکستان مدام اسہ ایلو نا موقف نا پبی مخ تفی ءِ کرینو۔ فلسطین آ اسرائیلی ظلم و بربریت و انسانی حق انا لتاڑنگ نا مذمت ءِ کینہ۔ چیئرمین سینیٹ پارے کہ کشمیر نا ویل آ ہڑتوم آ ملک آتا کمکاری خڑکی تعلقداری تا ڈیک ءِ۔ کشمیر نا جھیڑہ غا ازبکستان نا پبی کمکاری آ منت وار اُن۔ فلسطین و کشمیر نا ویل مسلم ملک آتا جاگہ غا انسانیت نا ویل ءِ۔ غٹ ملک آک اسیجائی وڑاٹ فلسطین و کشمیر اٹ انسانی حق انا لتاڑتیا توار بڑزکیر۔ فلسطین نا ویل آ اسرائیل تون اوار مچ آ دنیا ٹی لکھ آ بندغ آک مچی کریر۔ چیئرمین سینیٹ پارے کہ غٹ ملک آتا پارلیمانک اسیجائی لائحہ عمل اس اختیار کیر تو داجھیڑہ غاتا ایسر اس کشنگ مریک۔ وخت بسنے کہ اقوام عالم داجھیڑہ غاتا ایسری کن گام گیج کے تانکہ دنیا ٹی امن مننگ کے۔ گوادر نئے بیرہ پاکستان بلکن دنیا نا بے شمار ملک آتے کن گیم چینجراس جوڑ مریک۔ گوادر دے ٹک نیامی، نیامی ایشیائی، یورپ و افریقی ملک آتے ملفنگ نا گونڈانگا کسر ءِ ہراڑآن زرکاری وواپار ءِ مون آ دننگ دوئی مریک۔ پارلیمنٹرین ءِ ادارہ پارلیمانی خذمت(PIPS)پارلیمانی سروس فراوان کننگ ءِ، ازبکستان نا پارلیمنٹرین ءِ ہم سروسز فراوان کننگ کن تیار ءِ۔ اوڑدہی ٹی ازبک اسپیکر پارے کہ ازبکستان نا پارلیمنٹ، الس وحکومت پاکستان تون برادرانہ تعلقداری تے پین مون آ دننگ نا خواہندار ءِ۔ ہڑتوم آ ملک آتا نیام اٹ واپاری و زرکاری کمکاری نا مون آ دننگ نا سخت گرج ءِ۔ اوپارے کہ ہڑتوم آ ملک آتا نیام اٹ السی و پارلیمانی رابطہ غاتا مون آ دننگ وخت اناا ہم ءُ گرج اسے۔ پاکستان اٹی زرکاری کرسا ہڑتوم آ ملک آتا الس کن شونہالی اتنگک۔ اوکان گڈ شرفمند آ مہمان، مہمان تا کتاب اٹی تینا تاثرآتے ہم نوشتہ کرے۔
