مانسہرہ۔ 31 مئی (اے پی پی) قومی اسمبلی نا اسپیکر اسد قیصر پارینے کہ پاکستان قدرتی زیبائی آن شپ ءُ ملک اسے ہرانا درور ناران و کاغان نا زیبا انگا دامان تیان تننگک، پاکستان اٹی سیل و سوات نا زیات آن زیات وارخواہی فراوان کننگ ننا اولیت ءِ، سیل و سواتی ہند آتیا الس ءِ آسراتی فراوان کننگ کن حکومت چندی گام گیج کننگ ءِ، ننا است خواہی ءِ کہ دا ڈیہہ نا زیبائی و رونق مدام قائم ودائم سلے۔ او دوشنبے نادے آ پی ٹی آئی نا باسک قومی اسمبلی صالح محمد خان سواتی نا کنڈآن دورہ ناران و کاغان نا وخت آ صحافی تتون گپ وتران کریکہ۔ اوپارے کہ داجاگہ نا سیل وسواتی ہند آتا مچ آ دنیا نا زیبا انگا جاگہ غاتے ٹی شمار مریک، حکومت سیل وسواتی تا آسراتی نا فراوانی کن پین گا م گیج کننگ ءِ، نن دا علاقہ غاتے پین شون ترسا مچ آ دنیا نا سیل وسواتی تے داکنڈآ اتنگ کینہ۔ اسد قیصر پارے کہ دامان کاغان و ناراں زیباانگا دامانک ءُ، دانگیا برسا انسان دنیاءِ ہی گیرام کیک، داجاگہ نا مخلوق بھاز مہمان نواز ءُ، درملکی تے داکنڈآ اتسا حکومت ریونیو نا مد اٹ بھلو زر اس دوئی کننگ کیک۔ اوپارے کہ مچ آ ملک اٹی کورونا نا دین انا سوب آن زہمی مروک آ کاروبار دُوارہ بحال مننگ بناکرینے، سیل وسواتی ہند آک آباد مننگ نا بناءِ کرینو، سیل وسواتیک بھلو وخت اسے آن پد سیل وسواتی ہند آتیا پلو آ بننگ ءُ۔ اسپیکر اسد قیصر پارے کہ مخلوق ءِ داسہ ہم حکومت نا کنڈآن کورونا نا جاری ایس او پی تیا عمل کروئی مریک، خوانخواستہ دُن مف کہ دُوارہ کورونا نا کچ اٹ ودکی مرے و ولدا ننے تینا کاروبار و سیل و سواتی ہند آتے بند کروئی تمے۔ اوپارے کہ علاقہ نا محرومی تا بابت او وزیراعظم عمران خان تون ہیت کیک تانکہ اوفتے زوت آن زوت چٹفنگ مرے۔ داکان مست اسپیکر قومی اسمبلی اسد قیصر وزیراعلیٰ نا خصوصی کمکار خیبرپختونخواسید احمد حسین شاہ نا سلہ غا چیف ہاؤس کاغان آ سرمس، خصوصی کمکار سید احمد حسین شاہ اودے بخیر کرے۔ باسک قومی اسمبلی حاجی صالح محمد خان سواتی، ایلو ایم این اے، سینٹر آتیان بیدس شرفدار آ علاقہ نا بھلو کچ اس ساڑی ئسر۔ داوخت آ ہڑتوم آ راہشون تا نیام اٹ علاقائی و سیاسی حالیت آتیا گپ وتران مس۔
